विभागीय रेल्वे व्यवस्थापक प्रदीप कामले यांच्याकडून पुर्णा-अकोला मार्गाची सर्वंकष पाहणी

हिंगोली (Purna-Akola Railway Line) : नांदेड विभागाचे विभागीय रेल्वे व्यवस्थापक प्रदीप कामले यांनी १ सप्टेंबर मंगळवार रोजी पुर्णा छे अकोला दरम्यान रेल्वे पायाभूत सुविधा, परिचालन व्यवस्था आणि सुरू असलेल्या विकासकामांची सखोल पाहणी केली.

या दौऱ्यात त्यांनी अकोला ते पूर्णा दरम्यान रिअर विंडो निरीक्षण करून मार्गावरील पायाभूत सुविधा आणि परिचालन बाबींचा आढावा घेतला.पाहणी दरम्यान  कामले यांनी पूर्णा, हिंगोली आणि वाशिम स्थानकांवर अमृत स्टेशन योजनेअंतर्गत सुरू असलेल्या कामांच्या प्रगतीची पाहणी केली. तसेच बसमत, हिंगोली, वाशिम आणि शिवणी शिवापूर येथील गुड्स शेडच्या कामांची पाहणी करून कामाचा दर्जा आणि वेळेत पूर्णत्वावर भर देण्याच्या सूचना दिल्या.

त्यानंतर त्यांनी अकोला येथील क्रू लॉबी आणि रनिंग रूमच्या सुविधांची पाहणी केली व अकोला-अकोट विभागाशी संबंधित व्यवस्थांचा आढावा घेतला. अकोट रेल्वे स्थानकाची पाहणी करून तेथील प्रवासी सुविधा आणि विकासकामांची माहिती घेतली. विकासकामे वेळेत, गुणवत्तापूर्ण पद्धतीने पूर्ण करावीत तसेच प्रवासी व रेल्वे कर्मचाऱ्यांच्या सुविधांमध्ये अधिक सुधारणा करावी, अशा सूचना त्यांनी संबंधित अधिकाऱ्यांना दिल्या. या पाहणी दौऱ्यात अभियांत्रिकी, परिचालन, वाणिज्य, सिग्नल व दूरसंचार, विद्युत, टीआरएसओ, सुरक्षा, संरक्षा आणि गतिशक्ती विभागांचे वरिष्ठ अधिकारी उपस्थित होते.