आर्या लॉजवरील कारवाईत एका आरोपीविरोधात गुन्हा; गणेश तुपे आणि प्रवीण शिंदे फरार
सांगली शहरातील सिव्हिल हॉस्पिटल रोडवरील आर्या लॉजवर अनैतिक मानवी वाहतूक प्रतिबंधक कक्षाने छापा टाकत देहविक्री रॅकेटचा पर्दाफाश केला. पोलिसांनी कारवाईदरम्यान दोन महिलांची सुटका केली असून, या प्रकरणात एका व्यक्तीविरोधात गुन्हा दाखल करण्यात आला आहे. या प्रकरणातील आणखी दोन संशयित फरार असून, त्यांचा शोध पोलिसांकडून सुरू आहे.
आर्या लॉजमध्ये देहविक्रीचा व्यवसाय सुरू असल्याची माहिती पोलिसांना मिळाली होती. ‘फ्रीडम फर्म’ या संस्थेकडून मिळालेल्या माहितीनंतर अनैतिक मानवी वाहतूक प्रतिबंधक कक्षाने या प्रकरणाची पडताळणी केली. त्यासाठी पोलिसांनी डमी ग्राहकाच्या माध्यमातून माहितीची खातरजमा केली आणि त्यानंतर लॉजवर कारवाई केली.
पोलिसांनी लॉजवर छापा टाकताच परिसरात गोंधळाची परिस्थिती निर्माण झाली. या कारवाईत दोन महिलांना ताब्यात घेण्यात आले. पोलिसांच्या प्राथमिक तपासानुसार, या महिलांना जबरदस्तीने देहविक्रीच्या व्यवसायात आणण्यात आले होते. त्यानंतर पोलिसांनी दोन्ही महिलांची सुटका केली.
या प्रकरणात नितीन मनोहर चौगुले (वय ३५, रा. नागाव, ता. वाळवा) हा महिलांकडून देहविक्रीचा व्यवसाय करवून घेत असल्याची माहिती तपासातून समोर आली आहे. पोलिसांनी त्याच्याविरोधात कारवाई केली आहे.
दरम्यान, या रॅकेटमध्ये मुंबईतील चेंबूर येथे राहणाऱ्या गणेश तुपे आणि प्रवीण शिंदे या दोघांचीही नावे समोर आली आहेत. हे दोन्ही संशयित सध्या फरार असून, पोलिस त्यांचा शोध घेत आहेत.
याप्रकरणी सांगली शहर पोलिस ठाण्यात अनैतिक व्यापार प्रतिबंधक कायदा आणि बीएनएसच्या संबंधित कलमांनुसार गुन्हा दाखल करण्यात आला आहे. पोलिस अधीक्षक तुषार दोषी आणि अपर पोलिस अधीक्षक कल्पना बारवकर यांच्या मार्गदर्शनाखाली ही कारवाई करण्यात आली.
