पोतरा येथील पशुवैद्यकीय दवाखान्याला शेतकर्‍यांनी ठोकले कुलूप

उपचारा अभावी वासरू दगावले, गाय गंभीर, डॉक्टर कधीच हजर नसल्याचा आरोप

आखाडा बाळापूर (Potara Veterinary Clinic) : कळमनुरी तालुक्यातील पोतरा गावात पशुवैद्यकीय दवाखान्यात कर्मचारी हजर नसल्याने गायीवर योग्य उपचार न झाल्याने तिचे वासरू दगावल्याची संतापजनक घटना घडली आहे. या प्रकारामुळे संतप्त झालेल्या शेतकरी व गावकर्‍यांनी  २० ऑगस्ट गुरुवार रोजी पशुवैद्यकीय दवाखान्याला कुलूप ठोकले आहे. पोतरा येथील पशुवैद्यकीय समितीचे अध्यक्ष दत्तराव मुलगीर यांनी १९ ऑगस्ट बुधवार रोजी प्रसूतीसाठी गाय दवाखान्यात आणली होती. मात्र दवाखान्यात एकही कर्मचारी हजर नसल्याने तिच्यावर उपचारच झाले नाहीत. परिणामी वासरू उपचाराअभावी दगावले असून गाय देखील गंभीर अवस्थेत आहे. 

याबाबत जिल्हा पशुधन अधिकारी यांना दिलेल्या निवेदनात गावकर्‍यांनी गंभीर आरोप केले आहेत.पोतरा येथील पशुधन वैद्यकीय अधिकारी श्रेणी-१ डॉ. अजय राठोड हे रुजू झाल्यापासून दवाखान्यात एकदाही आले नाहीत.येथे आठवड्यातून दोन दिवस ड्युटी असलेले डॉ. जनकवाडे हे देखील दवाखान्यात येत नाहीत. त्यांना विचारले असता मला पोतरा येथे येण्यास वेळ नाही अशी उडवाउडवीची उत्तरे देतात- या (Potara Veterinary Clinic) दवाखान्यात फक्त सेवक गणपत बर्गे हेच हजर असतात, बाकी कोणीच हजर राहत नाही. सध्या पावसाळा सुरू असून गावातील अनेक जनावरे आजारी पडत आहेत. अशा वेळी उपचाराची कोणतीही सुविधा नसल्याने शेतकर्‍यांमध्ये प्रचंड रोष आहे.

या (Potara Veterinary Clinic) दवाखान्यात तातडीने कर्मचारी उपलब्ध करून द्यावेत, अशी मागणी निवेदनातून करण्यात आली आहे. या निवेदनावर दत्तराव मुलगीर, जीजाराम मुलगीर, अनिल रणखांब, व्यंकट मुलगीर, सुनील मुलगीर, गणेश मुलगीर, पंडितराव मुलगीर, बबन चौधरी, शिवाजी मुलगीर, रामराव मुलगीर, गणेश रणवीर, रघुनाथ मुलगीर, ओमप्रकाश मुलगीर, पारस चेभेले, संतोष भुसनर, दशरथ कलगोंडे, शंकर मुलगीर आदी शेतकर्‍यांच्या स्वाक्षर्‍या आहेत.