मदत आणि उपाययोजनांच्या कामात खंड पडू नये यासाठी प्रशासन सतर्क
नांदेड जिल्ह्यात निर्माण झालेल्या दुष्काळसदृश्य परिस्थितीच्या पार्श्वभूमीवर जिल्हा प्रशासनाने महत्त्वाचा निर्णय घेतला आहे. २ ते ४ ऑक्टोबरदरम्यान सरकारी सुट्ट्या असतानाही जिल्ह्यातील अधिकारी आणि कर्मचाऱ्यांना कार्यालयीन कामकाजासाठी उपस्थित राहण्याचे निर्देश देण्यात आले आहेत. परिस्थितीचे गांभीर्य लक्षात घेता अधिकारी-कर्मचाऱ्यांनी रजा घेऊ नये, असे आदेश जिल्हाधिकाऱ्यांकडून देण्यात आले आहेत.
जिल्हाधिकारी कार्यालयासह उपविभागीय अधिकारी आणि तहसील कार्यालयातील सर्व संबंधित अधिकारी व कर्मचाऱ्यांना या सूचनांचे पालन करावे लागणार आहे. सुट्टीच्या दिवसांमध्येही नियमित कार्यालयीन वेळेत उपस्थित राहून दुष्काळसदृश्य परिस्थितीशी निगडित कामकाजाचा आढावा घेण्याच्या सूचना प्रशासनाला देण्यात आल्या आहेत.
दुष्काळी परिस्थितीचा परिणाम झालेल्या नागरिकांना आवश्यक सुविधा आणि शासकीय मदत वेळेत उपलब्ध करून देण्यासाठी प्रशासनाने हा निर्णय घेतला आहे. मदतकार्य तसेच दुष्काळाच्या पार्श्वभूमीवर सुरू असलेल्या उपाययोजनांमध्ये कोणताही अडथळा किंवा खंड पडू नये, यासाठी अधिकारी-कर्मचाऱ्यांच्या सुट्ट्या रद्द करण्यात आल्या आहेत.
दरम्यान, यंदा पावसाने अपेक्षित साथ न दिल्याने शेतकऱ्यांसमोर मोठे संकट उभे राहिले आहे. राज्यातील 250 पेक्षा जास्त तालुके दुष्काळसदृश्य परिस्थितीत असल्याचा जीआर सरकारकडून काढण्यात आला आहे. या पार्श्वभूमीवर विविध नेते शेतकऱ्यांच्या बांधावर पोहोचून परिस्थितीचा आढावा घेत आहेत.
निसर्गाच्या प्रतिकूल परिस्थितीमुळे शेतकऱ्यांच्या हाती आलेल्या पिकांचे नुकसान झाल्याने सणासुदीच्या काळातही बळीराजावर आर्थिक संकट ओढावले आहे. अशा परिस्थितीत प्रशासकीय यंत्रणेकडून नागरिक आणि शेतकऱ्यांना मदत तातडीने मिळावी, यासाठी नांदेड जिल्ह्यात अधिकारी-कर्मचाऱ्यांना सुट्टी न घेण्याचे निर्देश देण्यात आले आहेत.
