आई आणि मुलाचा जागीच मृत्यू; दोन मुली गंभीर जखमी, घटनेमागचे कारण अद्याप अस्पष्ट
धाराशिव जिल्ह्यातील नळदुर्ग किल्ल्यावर घडलेल्या घटनेने खळबळ उडाली आहे. एका महिलेने आपल्या तीन मुलांसह किल्ल्यावरून उडी घेतल्याची घटना समोर आली आहे. या घटनेत महिला आणि तिच्या एका मुलाचा मृत्यू झाला असून दोन मुली गंभीर जखमी झाल्या आहेत. जखमी मुलींना उपचारासाठी धाराशिव येथील शासकीय रुग्णालयात दाखल करण्यात आले आहे.
मिळालेल्या माहितीनुसार, संबंधित महिला उमरगा तालुक्यातील वंताळा गावची रहिवासी असल्याची प्राथमिक माहिती आहे. दोन मुली आणि एका मुलासह ती नळदुर्ग किल्ल्यावर आली होती. त्यानंतर तिने मुलांसह किल्ल्यावरून उडी घेतली. या दुर्घटनेत महिला आणि तिच्या मुलाचा जागीच मृत्यू झाला, तर दोन्ही मुली गंभीर जखमी झाल्या.
घटनेची माहिती मिळताच नळदुर्ग पोलिसांनी तातडीने घटनास्थळी धाव घेतली. पोलिसांनी मृत महिला आणि मुलाचा मृतदेह ताब्यात घेऊन शवविच्छेदनासाठी रुग्णालयात पाठवला आहे. जखमी मुलींना पुढील उपचारासाठी धाराशिवच्या शासकीय रुग्णालयात पाठवण्यात आले.
महिलेने एवढे टोकाचे पाऊल नेमके कोणत्या कारणातून उचलले, याचा तपास नळदुर्ग पोलीस करत आहेत. घटनेचे कारण अद्याप स्पष्ट झालेले नाही. पोलिसांनी महिलेच्या कुटुंबीयांना घटनेची माहिती दिली असून त्यांचे जबाब नोंदवण्याची प्रक्रिया सुरू आहे.
या घटनेमुळे धाराशिव जिल्ह्यात मोठी खळबळ उडाली असून पोलिसांच्या तपासातून या घटनेमागील नेमके कारण समोर येण्याची शक्यता आहे.
