वाशी, ऐरोली, मुलुंड, एलबीएस आणि दहिसर टोलनाक्यांवर १ ऑक्टोबरपासून नवे दर लागू; मिनी बस, ट्रक, बस आणि अवजड वाहनांसाठी अधिक पैसे मोजावे लागणार
मुंबईत ये-जा करणाऱ्या वाहनचालकांच्या खर्चात आता वाढ झाली आहे. मुंबईच्या प्रवेशद्वारांवर असलेल्या पाच प्रमुख टोलनाक्यांवरील टोलदर १ ऑक्टोबरपासून वाढवण्यात आले आहेत. वाशी, ऐरोली, मुलुंड, एलबीएस आणि दहिसर या टोलनाक्यांवर नव्या दरानुसार वाहनचालकांकडून टोलवसुली केली जाणार आहे. वाहनांच्या प्रकारानुसार १५ ते ३५ रुपयांपर्यंत ही वाढ करण्यात आली आहे.
महाराष्ट्र राज्य रस्ते विकास महामंडळाने (MSRDC) या पाचही टोलनाक्यांसाठी सुधारित दर लागू केले आहेत. त्यानुसार मिनी बस आणि एल.सी.व्ही. वाहनांसाठी आता ९० रुपये टोल आकारला जाईल. ट्रक आणि बससाठी १८० रुपये, तर अवजड वाहनांसाठी २२५ रुपये टोल द्यावा लागणार आहे.
यापूर्वी मिनी बस आणि एल.सी.व्ही. वाहनांसाठी ७५ रुपये टोल आकारला जात होता. नव्या दरामुळे या वाहनांच्या टोलमध्ये १५ रुपयांची वाढ झाली आहे. ट्रक आणि बससाठी आधी १५० रुपये टोल होता, तो आता १८० रुपये करण्यात आला असून, या वाहनांच्या टोलमध्ये ३५ रुपयांची वाढ झाली आहे. अवजड वाहनांसाठी पूर्वी १९० रुपये टोल आकारला जात होता; आता त्यासाठी २२५ रुपये द्यावे लागणार आहेत.
मुंबईतील वाहतूक व्यवस्था अधिक सुरळीत करण्यासाठी आणि प्रवासाचा वेळ कमी करण्याच्या उद्देशाने महाराष्ट्र राज्य रस्ते विकास महामंडळाने मुंबईत ५५ उड्डाणपूल उभारले आहेत. या प्रकल्पांसाठी झालेला खर्च वसूल करण्याच्या उद्देशाने वाशी, ऐरोली, मुलुंड, एलबीएस आणि दहिसर या पाच ठिकाणी टोलनाके उभारण्यात आले असून, तेथून टोलवसुली सुरू आहे.
महत्त्वाचे म्हणजे या पाच टोलनाक्यांवरील टोलवसुली २०२७ पर्यंत सुरू राहणार असल्याची माहिती समोर आली आहे. त्यामुळे मुंबईच्या प्रवेशद्वारांवरून प्रवास करणाऱ्या वाहनचालकांना आता प्रत्येक फेरीसाठी वाढीव टोलचा आर्थिक भार सहन करावा लागणार आहे.
