भाईंदर-दादर लोकलमध्ये देवी दुर्गेला 56 भोगांचा नैवेद्य; भजन, पूजा आणि आरतीने डबा झाला भक्तिमय
मुंबई : मुंबईची लोकल म्हणजे धावपळ, गर्दी आणि रोजच्या प्रवासाचा अविभाज्य भाग. मात्र याच धावत्या लोकलमध्ये भक्ती आणि सामाजिक बांधिलकीचा अनोखा संगम पाहायला मिळाला. भाईंदरहून दादरकडे जाणाऱ्या सकाळी 10:20 वाजताच्या पश्चिम रेल्वेच्या लोकलमध्ये ‘ओंकार भजन मंडळी चॅरिटेबल ट्रस्ट’चा 21 वा वर्धापनदिन भक्तिमय वातावरणात साजरा करण्यात आला.
या विशेष कार्यक्रमासाठी मंडळीच्या सदस्यांनी आपल्या घरून विविध खाद्यपदार्थ आणि प्रसाद आणला होता. देवी दुर्गेच्या प्रतिमेसमोर 56 भोगांचा नैवेद्य अर्पण करण्यात आला. त्यानंतर धावत्या लोकलमध्ये पूजा, भजन आणि आरती करण्यात आली. या उपक्रमामुळे नेहमी गजबजलेल्या लोकलच्या डब्यात काही काळ आध्यात्मिक वातावरण निर्माण झाले. प्रवास करणाऱ्या इतर प्रवाशांनीही या सोहळ्याचा आनंद घेत सहभाग नोंदवला.
Mumbai - A unique celebration of devotion took place on the 10.20 am Bhayandar-Dadar local train, turning the compartment into a space of bhakti.Passengers marked the completion of 21 years of a special tradition by performing a full pooja and aarti in honour of the Goddess.… pic.twitter.com/dmsQPeHKQf
— NextMinute News (@nextminutenews7) August 11, 2026
वर्धापनदिनाच्या निमित्ताने मंडळीच्या सदस्यांनी केक कापून आनंद व्यक्त केला. त्यामुळे पारंपरिक भक्तीच्या कार्यक्रमाला आधुनिकतेचीही जोड मिळाली. पूजा, भजन आणि आरतीसोबतच सदस्यांनी एकत्र येत हा विशेष दिवस उत्साहात साजरा केला.
6 ऑगस्ट 2006 रोजी झाली मंडळीची स्थापना
‘ओंकार भजन मंडळी चॅरिटेबल ट्रस्ट’ची स्थापना 6 ऑगस्ट 2006 रोजी झाली. स्थापनेपासून मंडळीतील काही सदस्य दररोज सकाळी 10:20 वाजता भाईंदरहून सुटणाऱ्या पश्चिम रेल्वेच्या लोकलने प्रवास करतात. या प्रवासादरम्यान भजन आणि आरती केली जाते. त्यामुळे गर्दीने भरलेला लोकलचा डबा काही काळ भक्तीच्या वातावरणाने भारून जातो.
या मंडळीचे कार्य केवळ भजन आणि धार्मिक कार्यक्रमांपुरते मर्यादित नाही. आरतीदरम्यान जमा होणारा निधी समाजसेवा आणि गरजू व्यक्तींना मदत करण्यासाठी वापरला जातो. त्यामुळे लोकलमधून सुरू झालेली ही भक्तीची परंपरा सामाजिक उपक्रमाचेही माध्यम ठरली आहे.
मंडळीचे नेते कमलेश पटेल यांच्या मते, गेल्या 21 वर्षांत हा समूह केवळ भजन मंडळी राहिलेला नाही, तर एका कुटुंबाप्रमाणे एकत्र आला आहे. विविध भागांतून येणारे सदस्य दररोज एकत्र प्रवास करतात, भजन-पूजा करतात आणि एकमेकांच्या सुख-दुःखात सहभागी होतात. त्यामुळे मुंबईच्या धावत्या लोकलमध्ये सुरू झालेली ही परंपरा श्रद्धेसोबतच आपुलकी आणि सामाजिक बांधिलकीचा संदेश देत आहे.
