गर्दीमुळे दरवाजात उभ्या असलेल्या साईराज बेणारेचा हात सटकला; लोखंडी रॉडला अडकून गंभीर दुखापत
मुंबई : मुंबई लोकलमधील वाढती गर्दी प्रवाशांच्या जीवावर बेतत असल्याच्या घटना सलग दुसऱ्या दिवशी समोर आल्या आहेत. मुंबईच्या दिशेने जाणाऱ्या लोकलमधून प्रवास करताना २७ वर्षीय साईराज बेणारे याचा मुंब्रा परिसरात पडून मृत्यू झाला. गर्दीमुळे दरवाजात उभ्या असलेल्या साईराजचा हात सटकला आणि तो मुंब्रा ब्रिजवरून थेट खाडीत पडला. या वेळी लोखंडी रॉडला आदळल्याने तो गंभीर जखमी झाला आणि त्याचा मृत्यू झाला.
मिळालेल्या माहितीनुसार, साईराज बेणारे हा मंगळवारी सकाळी नेहमीप्रमाणे मुंबईच्या दिशेने जाणाऱ्या लोकलने प्रवास करत होता. लोकलमध्ये मोठ्या प्रमाणात गर्दी असल्याने त्याला डब्यात आत जाणे शक्य झाले नाही. त्यामुळे तो दरवाजाजवळ उभा होता. प्रवासादरम्यान अचानक त्याचा हात सटकला आणि तो मुंब्रा ब्रिजवरून खाली खाडीत पडला.
खाली पडताना साईराज ब्रिजच्या लोखंडी रॉडला अडकला. या दुर्घटनेत त्याला गंभीर दुखापत झाली. घटनेची माहिती मिळताच अग्निशमन दल, रेल्वे पोलीस आणि मुंब्रा पोलीस घटनास्थळी दाखल झाले. बराच वेळ बचावकार्य केल्यानंतर साईराजचा मृतदेह बाहेर काढण्यात आला. त्यानंतर मृतदेह शवविच्छेदनासाठी रुग्णालयात पाठवण्यात आला.
साईराजच्या मृत्यूची बातमी समोर आल्यानंतर त्याच्या कुटुंबीयांना मोठा धक्का बसला आहे. या प्रकरणी मुंब्रा पोलिसांनी अपघाती मृत्यूची नोंद केली असून पुढील तपास सुरू आहे.
सलग दुसऱ्या दिवशी लोकलमधून पडून मृत्यू
दरम्यान, याच्या आदल्या दिवशी म्हणजेच सोमवारीही धावत्या लोकलमधून पडून एका १७ वर्षीय मुलाचा मृत्यू झाला होता. मोहम्मद फाजील अन्सारी हा मित्रांसोबत मुंबईत फिरण्यासाठी आला होता. लोकलने प्रवास करत असताना कळवा रेल्वे स्थानकाजवळ त्याचा हात सटकला आणि तो धावत्या ट्रेनमधून खाली पडला.
या दुर्घटनेत मोहम्मद फाजीलच्या डोक्याला गंभीर दुखापत झाली होती. मोठ्या प्रमाणात रक्तस्राव झाल्याने त्याचा घटनास्थळीच मृत्यू झाला. त्याला तातडीने रुग्णालयात नेण्यात आले; मात्र उपचार सुरू करण्यापूर्वीच डॉक्टरांनी त्याला मृत घोषित केले.
सलग दोन दिवस लोकलमधून पडून दोन प्रवाशांचा मृत्यू झाल्याने मुंबईच्या लोकलमधील गर्दी आणि दरवाजात उभे राहून प्रवास करण्याचा धोका पुन्हा एकदा अधोरेखित झाला आहे.
