शेतकऱ्यांच्या विरोधामुळे शिंगी येथे शक्तिपीठ महामार्गाची मोजणी स्थगित

प्रशासनाची सामंजस्याची भूमिका; पंचनामा करून शेतकऱ्यांचा विरोध नोंदवला

वसमत (Shaktipeth Highway Protest) : तालुक्यातील शिंगी व परिसरात शक्तिपीठ महामार्गासाठी प्रस्तावित करण्यात आलेल्या जमिनीच्या मोजणीला परिसरातील शेतकऱ्यांनी एकजुटीने ठाम विरोध केला. शेतकऱ्यांचा तीव्र विरोध लक्षात घेऊन प्रशासनाने सामंजस्याची भूमिका घेत आजची मोजणी स्थगित केली. यावेळी शेतकऱ्यांच्या विरोधाची अधिकृत नोंद घेत पंचनामा करण्यात आला. मोजणीच्या अनुषंगाने ग्राम महसूल अधिकारी, पोलीस प्रशासन तसेच भूमी अभिलेख विभागाचे अधिकारी उपस्थित होते. मात्र, शक्तिपीठ महामार्गामुळे शेतजमिनीवर होणारा परिणाम आणि शेतकऱ्यांच्या विरोधाची भूमिका प्रशासनासमोर स्पष्ट करण्यात आली. त्यानंतर प्रशासनाने परिस्थिती सामंजस्याने हाताळत मोजणी पुढे न करण्याचा निर्णय घेतला.

यावेळी वसमत विधानसभा मतदारसंघाचे आमदार राजू नवघरे, वंचित बहुजन आघाडीचे माजी जिल्हाध्यक्ष अनिल कांबळे, शेतकरी संघटनेचे तालुकाध्यक्ष गोरख चव्हाण, पिंटू क्षीरसागर, सरपंच चव्हाण  यांच्यासह शिंगी व परिसरातील मोठ्या संख्येने शेतकरी उपस्थित होते.

शेतकऱ्यांनी शक्तिपीठ महामार्गासंदर्भात (Shaktipeth Highway Protest) आपला विरोध कायम असल्याचे स्पष्ट केले. प्रशासनाच्या उपस्थितीत करण्यात आलेल्या पंचनाम्यातही शेतकऱ्यांची विरोधाची भूमिका नोंदविण्यात आली. शेतकऱ्यांची एकजूट आणि ठाम विरोधामुळे शिंगी येथील आजची मोजणी स्थगित झाल्याने शेतकऱ्यांच्या संघर्षाला महत्त्वाचे यश मिळाले असल्याची भावना उपस्थित शेतकऱ्यांनी व्यक्त केली.