दाताडा बुद्रुक येथे ग्रामस्थांनी बस अडवून चालकाला जाब
सेनगाव (Sengaon Bus Accident) : सेनगाव तालुक्यातील कोळसा–सेनगाव–सापडगाव–सुकळी–दाताडा बुद्रुक–दाताडा खुर्द–वटकळी मार्गावर धावणाऱ्या मानव विकास मिशनच्या विद्यार्थिनींच्या बसचा चालक मद्यधुंद अवस्थेत बस चालवत असल्याचा धक्कादायक प्रकार सोमवारी दि. २७ जुलै सायंकाळच्या सुमारास उघडकीस आला. विद्यार्थिनींच्या सतर्कतेमुळे आणि ग्रामस्थांच्या तत्परतेमुळे संभाव्य मोठी दुर्घटना टळल्याने सर्वांनी सुटकेचा निःश्वास सोडला.
मिळालेल्या माहितीनुसार, विद्यार्थिनींना घेऊन बस दाताडा मार्गे वटकळीच्या दिशेने जात असताना चालकाच्या संशयास्पद हालचाली विद्यार्थिनींच्या लक्षात आल्या. बस भरधाव आणि अस्थिर पद्धतीने चालवली जात असल्याचे जाणवताच विद्यार्थिनींनी प्रसंगावधान राखत बस तातडीने थांबविण्याची मागणी केली.
ही माहिती मिळताच दाताडा बुद्रुक येथील नागरिकांनी बस अडवून चालकाला जाब विचारला. चालकाची तपासणी केली असता तो मद्यप्राशन केलेल्या अवस्थेत असल्याचे निदर्शनास आल्याचा आरोप ग्रामस्थांनी केला. या घटनेनंतर परिसरात मोठ्या प्रमाणात नागरिकांची गर्दी झाली आणि संतप्त वातावरण निर्माण झाले. घटनेची माहिती संबंधित अधिकाऱ्यांना देण्यात आल्यानंतर दुसरा चालक घटनास्थळी बोलावण्यात आला. त्यानंतर विद्यार्थिनींच्या सुरक्षिततेची काळजी घेत बस हिंगोली आगारात रवाना करण्यात आली.
या गंभीर प्रकारामुळे पालकवर्गात तीव्र संताप व्यक्त होत असून, विद्यार्थिनींच्या जीवाशी खेळ करणाऱ्या संबंधित चालकावर तात्काळ निलंबनाची कारवाई करून कठोर शिस्तभंगात्मक पावले उचलावीत, अशी जोरदार मागणी होत आहे. तसेच मानव विकास मिशनच्या बस चालकांची नियमित वैद्यकीय तपासणी व मद्यपान चाचणी करण्याचीही मागणी पुढे आली आहे. स्थानिक नागरिकांनी सांगितले की, विद्यार्थिनींच्या सुरक्षिततेच्या दृष्टीने अशा निष्काळजीपणाला कोणतीही माफी देता येणार नाही. संबंधित घटनेची सखोल चौकशी करून दोषींवर कठोर कारवाई करण्यात यावी, अशी अपेक्षा व्यक्त केली जात आहे.
