छत्रपती शिवाजी महाराज चौकात मराठा आंदोलकांची घोषणाबाजी
पाथरी (Manoj Jarange Patil Andolan) : तालुक्या अंतरवाली सराटी येथे संघर्षयोद्धा मनोज जरांगे पाटील यांनी सुरू केलेल्या आमरण उपोषणास पाठिंबा देण्यासाठी तसेच मराठा समाजाच्या प्रलंबित मागण्यांवर शासनाने तातडीने निर्णय घ्यावा या मागणीसाठी पाथरी शहरात बुधवार २ सप्टेंबर रोजी सकाळी १०.३० . वा .रास्ता रोको आंदोलन करण्यात आले.
पाथरी शहरातील छत्रपती शिवाजी महाराज चौकात राष्ट्रीय महामार्गावर मराठा आंदोलकांनी (Manoj Jarange Patil Andolan) सकाळी साडेदहा वाजता रास्ता रोको केला. यावेळी आंदोलकांनी जोरदार घोषणाबाजी करत शासनाने संघर्षयोद्धा मनोज जरांगे पाटील यांच्या मागण्यांवर तातडीने सकारात्मक निर्णय घ्यावा अशी मागणी केली. हैदराबाद गॅझेटनुसार मराठा समाजातील बांधवांना कुणबी प्रमाणपत्र व त्यास वैधता देणे, अण्णासाहेब पाटील आर्थिक मागास विकास महामंडळाकडील प्रलंबित व्याज परतावे अदा करणे तसेच पंजाबराव देशमुख विद्यार्थी शिष्यवृत्ती योजनेचा लाभ विद्यार्थ्यांना तातडीने देण्यात यावा अशा प्रमुख मागण्या आंदोलकांनी केल्या.
रास्ता रोको आंदोलनामुळे राष्ट्रीय महामार्ग क्रमांक ५४८ बी आणि राष्ट्रीय महामार्ग क्रमांक ६१ वर वाहनांच्या रांगा लागल्या होत्या. परिस्थिती नियंत्रणात ठेवण्यासाठी घटनास्थळी मोठा पोलीस बंदोबस्त तैनात करण्यात आला होता. (Manoj Jarange Patil Andolan) आंदोलनामध्ये सर्वपक्षीय नेते कार्यकर्ते ही सहभागी झाले होते. दरम्यान आंदोलकांकडून पोलिसांना मागण्या संदर्भात निवेदन देण्यात आले .यामध्ये उद्या पाथरी शहर बंद असल्याचे म्हटले आहे.