गाळेधारकांकडून दुकानांसमोरील जागेचा पोटभाड्याने वापर? पार्किंगअभावी रस्त्यावर वाहने; नागरिकांवर दंडाचा भुर्दंड
मलकापूर : शहरातील सत्यम चौक परिसरातील नगरपालिका संकुल सध्या अतिक्रमणाच्या विळख्यात सापडल्याचे चित्र आहे. नगरपालिका संकुलातील काही गाळेधारकांनी दुकानांसमोरील वाहनतळासाठी उपलब्ध असलेल्या जागेचा व्यावसायिक वापर सुरू केल्याने नागरिकांसमोर मोठी अडचण निर्माण झाली आहे. दुकानांसमोरील जागा किरकोळ व्यापाऱ्यांना पोटभाड्याने देण्यात येत असल्याचा आरोप असून, त्यामुळे ग्राहक व वाहनधारकांसाठी उपलब्ध असलेली जागा कमी होत आहे.
संकुलासमोर वाहन उभे करण्यासाठी पुरेशी जागा उपलब्ध नसल्याने अनेक नागरिकांना नाईलाजाने आपली वाहने रस्त्यावर उभी करावी लागतात. परिणामी वाहतुकीला अडथळा निर्माण होत असून, वाहतूक पोलिसांकडून नियमभंगाबाबत वाहनांवर कारवाई व दंड केला जात आहे. त्यामुळे नागरिकांना आर्थिक भुर्दंड सहन करावा लागत आहे.
जागा अडविणाऱ्यांवर कारवाई कधी?
एकीकडे नागरिकांनी वाहतूक नियमांचे पालन करावे, अशी अपेक्षा प्रशासनाकडून व्यक्त केली जाते; मात्र दुसरीकडे वाहनतळासाठी असलेल्या जागेवर अतिक्रमण होत असेल, तर त्यावर नियंत्रण ठेवण्याची जबाबदारी संबंधित नगरपालिका प्रशासनाची आहे. त्यामुळे अतिक्रमण करणाऱ्यांवर कारवाई न करता केवळ रस्त्यावर वाहने उभी करणाऱ्या नागरिकांवर दंडात्मक कारवाई होत असेल, तर हा प्रश्न गंभीर ठरत आहे.
नगरपालिका संकुलातील दुकानांसमोरील जागेचा नेमका वापर कोणत्या परवानगीच्या आधारे केला जात आहे, पोटभाडेकरूंना जागा देण्यात आली आहे का, तसेच सार्वजनिक वापराच्या जागेवर अतिक्रमण झाले आहे का, याची नगरपालिका प्रशासनाने तातडीने तपासणी करण्याची गरज आहे.
पालिका प्रशासनाच्या कार्यक्षमतेवर प्रश्नचिन्ह
सत्यम चौक हा शहरातील वर्दळीचा भाग असून येथे नागरिकांची तसेच वाहनांची मोठी ये-जा असते. अशा महत्त्वाच्या ठिकाणी अतिक्रमणामुळे पार्किंगची समस्या आणि वाहतूक कोंडी निर्माण होत असताना नगरपालिका प्रशासनाकडून ठोस उपाययोजना होत नसल्याचे चित्र दिसून येत आहे.
नगरपालिका प्रशासनाने संकुलासमोरील जागेची प्रत्यक्ष पाहणी करून अतिक्रमण हटवावे, पोटभाड्याने जागा देण्याबाबतची वस्तुस्थिती तपासावी आणि नागरिकांसाठी वाहनतळाची जागा मोकळी करून द्यावी, अशी मागणी नागरिकांकडून होत आहे.
नागरिकांच्या सोयीसाठी असलेली जागा काहींच्या व्यावसायिक फायद्यासाठी वापरली जात असेल, तर त्यावर वेळीच कारवाई करणे आवश्यक आहे. अन्यथा अतिक्रमण करणाऱ्यांना मोकळे रान आणि नियम पाळणाऱ्या नागरिकांना दंड, अशी विसंगत परिस्थिती कायम राहण्याची शक्यता आहे.
