आखाडा बाळापूर (Bus Stealing Jewelry) : वाशिम जिल्ह्यातील मालेगाव येथील एकजण मालेगाव ते आखाडा बाळापूर मार्गावरून बसमध्ये जात असताना अज्ञात चोरट्यांनी एका प्रवाशाच्या बॅग मधील २ लाख ८० हजार रुपयाचे सोन्याचे दागिणे लांबविल्याने आखाडा बाळापूर पोलिस ठाण्यात शनिवारी गुन्हा दाखल करण्यात आला आहे.
याबाबत पोलिस सुत्रांनी दिलेली माहिती अशी की, वाशिम जिल्ह्यातील मालेगाव येथील गणेश शिंदे हे कळमनुरी तालुक्यातील आखाडा बाळापूर येथील शिक्षक कॉलनीमध्ये वास्तव्यास राहतात. गावाकडे काम असल्यामुळे शिंदे हे आपल्या कुटूंबीयासह मालेगाव येथे गेले होते. शनिवारी २५ एप्रिलला दुपारच्या सुमारास अकोला ते नांदेड या बसमध्ये मालेगाव येथून बसले होते. यावेळी बसमध्ये प्रवाशांची मोठी गर्दी होती. या (Bus Stealing Jewelry) गर्दीचा फायदा चोरट्यांनी घेऊन मालेगाव ते आखाडा बाळापूर दरम्यान त्यांच्या बॅगमधून १ लाख ४० हजार रुपयाचे १ तोळ्याचे सोन्याचे गंठण आणि १ लाख ४० हजार रुपयाचा ५ ग्रॅम सोन्याचे मनी व ५ ग्रॅमचे सोन्याचे पेंडॉल असा एकुण २ लाख ८० हजार रुपयाचा ऐवज चोरून नेला.
आखाडा बाळापूर येथे शिंदे कुटूंबीय घरी आल्यावर त्यांनी बॅगची पाहणी केली असता त्यात दागिणे दिसून आले नाही. त्यांनी तात्काळ आखाडा बाळापूर पोलिस ठाण्यात धाव घेऊन रितसर तक्रार दिली. ज्यामध्ये २ लाख ८० हजार रुपयाचे दागिणे चोरीस गेल्याने गुन्हा दाखल करण्यात आला. या प्रकरणाचा पुढील तपास जमादार जोगदंड हे करीत आहेत.
