पोहरादेवी येथील नगारा म्युझियमच्या १ किमी परिसरात आंदोलन, उपोषणास बंदीची मागणी!

सामाजिक कार्यकर्त्यांकडून उपविभागीय अधिकाऱ्यांना निवेदन!

मानोरा (Pohradevi Nagara Museum) : जगप्रसिद्ध नंगारा  म्युझियम बंजारा विरासत भवन हे राष्ट्रीय स्मारक असून येथील पावित्र्य आणि सुव्यवस्था राखण्यासाठी मानोरा तालुक्यातील तीर्थक्षेत्र पोहरादेवी येथील म्युझियम व परिसरातील १ किलोमीटर परिसरात कोणत्याही प्रकारचे आंदोलन, उपोषण, अवैध जमाव करण्यास प्रतिबंध करावा, अशी मागणी सामाजिक कार्यकर्ते  वाईगौळ ग्रा. प. चे  प्रशासक सरपंच उमेश पांडुरंग राठोड, मोंटी राठोड महाराज व ध्रुव राठोड यांनी उपविभागीय अधिकारी, कारंजा (महसूल) यांचेकडे दि. २० ऑगस्ट २०२६ रोजी निवेदन सादर करत केली आहे. 

निवेदनात म्हटले आहे की, नंगारा म्युझियम विरासत (Pohradevi Nagara Museum) हे राष्ट्रीय स्मारक आहे. येथे देशभरातून दररोज शेकडो व सण उत्सवात हजारो - लाखो पर्यटक, भाविक भक्त दर्शनासाठी येतात. अशा ठिकाणी कोणत्याही प्रकारचे आंदोलन किंवा जमाव केल्यास गैरकृत्य होऊ शकते.  राजकीय आंदोलनामुळे येणाऱ्या पर्यटकांवर, वृद्ध माता - भगिनींवर, गरोदर महिलांवर व लहान मुलांवर त्याचा परिणाम होऊ शकतो. भविष्यात एखादे आंदोलन तीव्र झाल्यास जीवितहानी होण्याची शक्यता नाकारता येत नाही.

तसेच नंगारा म्युझियम विरासत (Pohradevi Nagara Museum) मालमत्तेचे नुकसान होऊ शकते. त्यामुळे राजकीय आंदोलन, उपोषण, निदर्शने किंवा अवैध जमाव करणे प्रतिबंधित करणे आवश्यक आहे. अन्यथा एखादा अनुचित प्रकार घडल्यास शासनाची जबाबदारी असेल. म्हणून बंजारा म्युझियमच्या १ किलोमीटर परिसरात कलम १४४ लागू करून सदर क्षेत्र कायमस्वरूपी प्रतिबंधित करण्यात यावे, अशी मागणी निवेदनाद्वारे करण्यात आली आहे.