हिंगोली : शहराच्या मध्यवस्तीत असलेल्या महादेव वाडी येथील जागृत देवस्थान श्री तुळजाभवानी मंदिराचा २०२६ मध्ये भव्य जीर्णोद्धार करण्यात आला आहे. तब्बल ५३ वर्षांची ऐतिहासिक परंपरा लाभलेल्या या मंदिराच्या नूतनीकरणामुळे परिसरातील भाविकांमध्ये आनंदाचे वातावरण आहे.
स्थानिक ज्येष्ठ नागरिकांनी दिलेल्या माहितीनुसार, १९७२ साली श्री शंकर त्रिंबकराव लव्हाळे (मापारी) यांच्या राहत्या घरी श्री तुळजाभवानी देवीची घटस्थापना करण्यात आली होती. त्यावेळी हिंगोली शहरात अन्यत्र तुळजाभवानी देवीचे मंदिर नव्हते. या धार्मिक कार्यासाठी बाबुराव विश्वनाथ डहाळे, श्री. शंकरराव लव्हाळे, स्व. मोतीराम भोंडवे, श्री. रामलाल बनचरे, स्व. हिरालालजी बंबरुले, स्व. गोविंदराव भुसांडे, स्व. देवकीलाल पेरिया आणि जनार्दन घोलप यांसारख्या प्रतिष्ठित नागरिकांनी मोलाचे सहकार्य केले.
कालांतराने देवीच्या दर्शनासाठी येणाऱ्या भाविकांची संख्या वाढू लागली. त्यामुळे १९८० साली महादेव वाडी येथे महादेवाचे छोटेसे देऊळ बांधण्यात आले. या मंदिरात श्री तुळजाभवानी देवीची संगमरवरी मूर्ती विधिवत प्रतिष्ठापित करण्यात आली. तेव्हापासून दरवर्षी नवरात्रोत्सवात नऊ दिवस अखंड ज्योत प्रज्वलित ठेवून भंडारा आणि देवीचा जागर आयोजित केला जातो.
लोकप्रतिनिधी आणि सामाजिक कार्यकर्त्यांच्या पुढाकारातून जीर्णोद्धार
अनेक वर्षांपासून मंदिराची अवस्था जीर्ण झाली होती. अखेर स्थानिक नागरिक आणि लोकप्रतिनिधींनी पुढाकार घेत २०२६ मध्ये मंदिराच्या संपूर्ण जीर्णोद्धाराचे काम पूर्ण केले.
हा जीर्णोद्धार आमदार संतोषराव बांगर, हिंगोली नगर परिषदेच्या नगराध्यक्षा सौ. रेखाताई श्रीराम बांगर, गटनेते श्रीराम बांगर आणि नगरसेविका सौ. इंदुबाई नंदकुमार बांगर यांच्या सहकार्यातून पूर्ण झाला. तसेच स्थानिक सामाजिक कार्यकर्ते चंदू शंकरराव लव्हाळे (जिल्हाध्यक्ष, समता परिषद) आणि अशोक गोविंद भुसांडे यांनी या कामासाठी अथक परिश्रम घेतले.
नवरात्रोत्सवात हजारो भाविकांनी घेतले दर्शन
महादेव वाडी येथील श्री तुळजाभवानी देवी नवसाला पावणारी असल्याची भाविकांची श्रद्धा असून, हे देवस्थान संपूर्ण हिंगोली जिल्ह्यात प्रसिद्ध आहे. यंदाच्या नवरात्रोत्सवात हजारो भाविकांनी मंदिरात येऊन देवीचे दर्शन घेतले. उत्सवादरम्यान मंदिर परिसरात आकर्षक विद्युत रोषणाई करण्यात आली होती. तसेच परिसरात स्वच्छतेची विशेष काळजी घेण्यात आली.
मंदिराच्या विकासासाठी कायमस्वरूपी निधीची मागणी
मंदिराचा जीर्णोद्धार पूर्ण झाल्यानंतर भाविकांनी समाधान व्यक्त केले आहे. यासोबतच मंदिराचा पुढील विकास आणि देखभाल व्यवस्थित सुरू राहावी, यासाठी कायमस्वरूपी निधी उपलब्ध करून द्यावा, अशी मागणी भाविकांनी लोकप्रतिनिधींकडे केली आहे.
५३ वर्षांची धार्मिक परंपरा जपणाऱ्या या मंदिराच्या जीर्णोद्धारामुळे महादेव वाडीतील श्री तुळजाभवानी देवस्थानाला नवे रूप प्राप्त झाले असून, भाविकांसाठी हे मंदिर श्रद्धेचे महत्त्वाचे केंद्र बनले आहे.