कुरुंदा येथे इमारतीवरून पडून तरुण कामगाराचा मृत्यू

कुरुंदा/ हिंगोली (Young Worker Death) : कुरुंदा येथे टॉवरचे काम सुरु असताना इमारतीवरून तोल जाऊन खाली पडल्याने एका तरुण कामगाराचा उपचारादरम्यान मृत्यू झाला. ही दुर्दैवी घटना २१ ऑगस्ट रोजी दुपारच्या सुमारास घडली. मृत तरुणाचे नाव संदीप माधव काळे (वय २५, रा. गणेश नगर, कुरुंदा) असे आहे.

मिळालेल्या माहितीनुसार, कुरुंदा येथील जामवाडी गल्लीत एका इमारतीचे बांधकाम सुरू आहे. संदीप हा मिस्त्रीच्या हाताखाली मजूर म्हणून काम करत होता. इमारतीवर काम करत असताना अचानक तोल जाऊन तो जमिनीवर कोसळला. या अपघातात तो गंभीर जखमी झाला.

त्याला तात्काळ कुरुंदा येथील प्राथमिक आरोग्य केंद्रात दाखल करण्यात आले, तेथून पुढील उपचारासाठी वसमत येथील शासकीय रुग्णालयात हलविण्यात आले. मात्र उपचारादरम्यान त्याचा मृत्यू झाला. (Young Worker Death) वसमत येथे शवविच्छेदन करण्यात आले आहे.

संदीप याच्या पश्चात आई आणि दोन भाऊ असा परिवार आहे. त्याच्या अकाली मृत्यूने कुटुंबावर दुःखाचा डोंगर कोसळला असून गावात सर्वत्र हळहळ व्यक्त होत आहे. दरम्यान, या घटनेची अद्याप पोलिसांत नोंद झालेली नसून पुढील प्रक्रिया सुरू असल्याची माहिती मिळत आहे.