पुण्यात पती-पत्नीचा वाद विकोपाला; पतीच्या हातात गोळी, नेमका गोळीबार कोणी केला?

कसबा पेठेतील भैरवनाथ मंदिराजवळील घटना; घटनास्थळी पिस्तूल, जिवंत काडतूस आणि रक्ताचे डाग आढळले

पुणे : पुण्यातील कसबा पेठ परिसरात पती-पत्नीतील कौटुंबिक वादानंतर गोळीबाराची धक्कादायक घटना सोमवारी घडली. फरासखाना पोलीस ठाण्याच्या हद्दीतील भैरवनाथ मंदिराजवळ झालेल्या या प्रकारात पतीच्या उजव्या हाताला गोळी लागली असून त्याला तातडीने उपचारासाठी रुग्णालयात दाखल करण्यात आले आहे. मात्र, पतीने स्वतःवरच गोळी झाडली की गोळीबारामागे अन्य काही कारण आहे, याबाबत पोलिसांकडून सखोल तपास सुरू आहे.

प्राथमिक तपासात पती-पत्नीमधील वाद तीव्र स्वरूपाचा झाल्याची माहिती समोर आली आहे. वादादरम्यान दोघांमध्ये एकमेकांना गोळी मारण्यासंदर्भात संभाषण झाल्याचेही तपासातून पुढे आले आहे. पत्नीने कथितरित्या पतीला स्वतःवर गोळी झाडण्यास सांगितले, तर पतीने पत्नीला आपल्यावर गोळी झाडण्याचे म्हटल्याची माहिती मिळत आहे.

याच वादाच्या दरम्यान गोळीबार झाला आणि पतीच्या उजव्या हाताला गोळी लागली. जखमी अवस्थेतील पतीला तातडीने रुग्णालयात हलविण्यात आले. घटनेनंतर पत्नीही घटनास्थळी नसल्याचे सांगण्यात येत असून तीदेखील रुग्णालयात गेल्याची माहिती आहे. तिची चौकशी झाल्यानंतर या प्रकरणातील अधिक तपशील स्पष्ट होण्याची शक्यता आहे.

दरम्यान, घटनास्थळी पोलिसांना रक्ताचे डाग, एक पिस्तूल तसेच एक जिवंत काडतूस आढळून आले. फरासखाना पोलिसांनी पंचनामा करून पिस्तूल आणि इतर पुरावे ताब्यात घेतले आहेत.

पती-पत्नीमधील वादाचे नेमके कारण काय होते, गोळी नेमकी कोणी झाडली, पिस्तूल कोणाच्या ताब्यात होते आणि गोळीबार कोणत्या परिस्थितीत झाला, या सर्व बाबींचा तपास फरासखाना पोलीस करत आहेत. पतीच्या उजव्या हाताला गोळी लागल्याचे स्पष्ट झाले असले, तरी गोळीबाराच्या घटनेमागील नेमका घटनाक्रम तपासानंतरच समोर येणार आहे.