इनपुट टॅक्स क्रेडिट (ITC) अनब्लॉक करण्यासाठी सुरुवातीला ₹1 लाखांची मागणी; एसीबीच्या सापळ्यात दोघेही रंगेहाथ अटकेत
जालना जिल्ह्यात भ्रष्टाचारविरोधी विभागाने (ACB) मोठी कारवाई करत जीएसटी विभागातील महिला राज्य कर अधिकारी आणि एका खासगी कर सल्लागाराला ₹60 हजारांची लाच स्वीकारताना रंगेहाथ पकडले. या कारवाईमुळे महसूल विभागात खळबळ उडाली असून प्रकरणाचा पुढील तपास सुरू आहे.
या प्रकरणात अटक करण्यात आलेल्यांमध्ये राज्य कर अधिकारी सुवर्णा लोहिया आणि खासगी कर सल्लागार अक्षय जैन (लोढा) यांचा समावेश आहे.
एसीबीकडे दाखल झालेल्या तक्रारीनुसार, तक्रारदार व्यावसायिकाचे इनपुट टॅक्स क्रेडिट (ITC) अनब्लॉक करून देण्यासाठी सुरुवातीला ₹1 लाखांची लाच मागण्यात आली होती. तक्रारीची पडताळणी सुरू असताना 17 जुलै रोजी तक्रारदार जीएसटी कार्यालयात गेला असता, सुवर्णा लोहिया यांनी कॅल्क्युलेटरवर ₹80 हजारांचा आकडा दाखवून लाचेची मागणी केल्याचा आरोप आहे.
त्यावेळी कार्यालयात उपस्थित असलेल्या खासगी कर सल्लागार अक्षय जैन यांनीही तक्रारदाराला लाच देण्याचा सल्ला दिल्याचे तक्रारीत नमूद करण्यात आले आहे. त्यानंतर संबंधित व्यक्तीने पोलिसांकडे धाव घेतल्यानंतर माहितीची पडताळणी करून एसीबीने सापळा रचला.
28 जुलै रोजी तक्रारदाराकडून ₹60 हजारांची लाच स्वीकारल्यानंतर सुवर्णा लोहिया यांनी ती रक्कम आपल्या टेबलच्या ड्रॉवरमध्ये ठेवल्याचे एसीबीच्या कारवाईत निष्पन्न झाले. ठरलेल्या संकेत मिळताच एसीबीच्या पथकाने तातडीने धाड टाकून सुवर्णा लोहिया आणि अक्षय जैन या दोघांना ताब्यात घेतले.
ही कारवाई एसीबीचे उपअधीक्षक बाळू जाधवर यांच्या मार्गदर्शनाखाली पार पडली. तपासादरम्यान दोन्ही आरोपींचे मोबाईल जप्त करण्यात आले असून, त्यामधून आणखी काही आर्थिक व्यवहार किंवा महत्त्वाचे पुरावे समोर येतात का, याची चौकशी सुरू आहे.
या घटनेमुळे जीएसटी विभागातील कामकाजाच्या पारदर्शकतेबाबत पुन्हा एकदा प्रश्न उपस्थित झाले असून, प्रकरणाचा अधिक तपास एसीबीकडून सुरू आहे.
