उपमुख्यमंत्री एकनाथ शिंदे यांनी जाहीर केलेल्या आर्थिक मदतीचे ३१ ऑक्टोबर रोजी वितरण; श्रीराम बांगर यांची उपस्थिती
हिंगोली शहरातील फटाक्यांच्या गोदामाला लागलेल्या भीषण आगीत जीव गमावलेल्या तिघांच्या कुटुंबीयांना अखेर आर्थिक मदतीचा आधार मिळाला आहे. उपमुख्यमंत्री तथा शिवसेनेचे मुख्य नेते एकनाथ शिंदे यांनी जाहीर केलेल्या प्रत्येकी पाच लाख रुपयांच्या मदतीचे ३१ ऑक्टोबर, शनिवारी वितरण करण्यात आले. शिवसेना जिल्हाप्रमुख तथा आमदार संतोष बांगर आणि हिंगोली नगर परिषदेचे गटनेते श्रीराम बांगर यांच्या हस्ते मृतांच्या वारसांकडे ही मदत सुपूर्द करण्यात आली.
हिंगोली शहरातील मारवाडी गल्ली परिसरात ५ ऑक्टोबर रोजी ही दुर्दैवी घटना घडली होती. विजयकुमार बासटवार यांच्या निवासस्थानी साठवून ठेवलेल्या फटाक्यांच्या गोदामाला अचानक भीषण आग लागली. या आगीत अडकलेल्यांना वाचवण्यासाठी गेलेल्या अविनाश बांगर यांचा आगीत होरपळून मृत्यू झाला होता.
या दुर्घटनेत अनेकजण गंभीररीत्या भाजले होते. त्यांना पुढील उपचारांसाठी छत्रपती संभाजीनगर आणि लातूर येथील रुग्णालयांमध्ये दाखल करण्यात आले होते. उपचार सुरू असतानाच हिंगोली नगर परिषद अग्निशमन दलातील कर्मचारी दिलीप दोडके आणि आकाश सांगळे यांचाही मृत्यू झाला. त्यामुळे या आगीत मृत्यू झालेल्यांची संख्या तीन झाली होती.
या दुर्घटनेत कुटुंबातील सदस्य गमावलेल्या वारसांना आर्थिक हातभार मिळावा, यासाठी उपमुख्यमंत्री एकनाथ शिंदे यांनी मृतांच्या कुटुंबीयांना प्रत्येकी पाच लाख रुपये देण्याची घोषणा केली होती. या घोषणेनुसार ३१ ऑक्टोबर रोजी आमदार संतोष बांगर आणि नगर परिषद गटनेते श्रीराम बांगर यांच्या वतीने संबंधित कुटुंबीयांना प्रत्येकी पाच लाख रुपयांची आर्थिक मदत प्रदान करण्यात आली.
यावेळी युवासेना जिल्हाप्रमुख राम कदम, शिवसेनेचे नगरसेवक सुभाष बांगर, गणेश बांगर, रत्नाकर बांगर, सुमित कांबळे, विशाल गोटरे, रामकिशन बांगर, कंत्राटदार संतोष आर. बांगर, संदीप बांगर यांच्यासह शिवसेनेचे पदाधिकारी आणि कार्यकर्ते उपस्थित होते.
या आर्थिक मदतीमुळे हिंगोलीतील जळीतकांडात आपल्या कुटुंबातील सदस्य गमावलेल्या तीनही कुटुंबांना कठीण परिस्थितीत आर्थिक आधार मिळणार आहे.