हिंगोलीतील कावड यात्रेत खासदार श्रीकांत शिंदेंकडून ज्येष्ठ नगरसेवक सुभाष बांगर यांचे कौतुक

सुभाष बांगर यांचा मुलगा आणि सून दोघेही ‘एसपी’ असल्याचा अभिमान

हिंगोली (MP Shrikant Shinde) : कळमनुरी विधानसभेचे आमदार संतोष बांगर यांच्या नेतृत्वाखाली दरवर्षीप्रमाणे याही वर्षी अत्यंत भक्तिमय व उत्साही वातावरणात भव्य कावड यात्रा काढण्यात आली. श्री क्षेत्र चिंचाळे महादेव मंदिर येथून भक्तिभावाने निघालेली ही कावड यात्रा हिंगोली शहरातील मुख्य मार्गाने मार्गक्रमण करत गांधी चौक येथे मोठ्या उत्साहात संपन्न झाली.

​या कार्यक्रमाप्रसंगी व्यासपीठावर खासदार तथा शिवसेना गटनेते श्रीकांत शिंदे (MP Shrikant Shinde) यांची विशेष उपस्थिती होती. या सोहळ्यात हिंगोली नगरपरिषदेचे ज्येष्ठ नगरसेवक सुभाष बांगर यांच्या हस्ते खासदार श्रीकांत शिंदे यांचा जंगी सत्कार करण्यात आला. ​सत्कार सोहळ्या दरम्यान आमदार संतोष बांगर यांनी खासदार श्रीकांत शिंदे यांना नगरसेवक सुभाष बांगर यांच्या कौटुंबिक यशाची ओळख करून दिली. "नगरसेवक सुभाष बांगर यांचा मुलगा वैभव सुभाषराव बांगर हे सध्या वाराणसी येथे अतिरिक्त पोलीस आयुक्त म्हणून कार्यरत आहेत, तर त्यांची सून नीतू वैभव बांगर यादेखील वाराणसी येथेच अप्पर पोलीस अधीक्षक म्हणून सेवा बजावत आहेत," अशी माहिती आमदार बांगर यांनी दिली.

​एकाच घरातील मुलगा आणि सून दोघेही उच्चपदस्थ पोलीस अधिकारी (एसपी) म्हणून देशसेवा करत असल्याचे ऐकून खासदार श्रीकांत शिंदे यांनी नगरसेवक सुभाष बांगर यांचे विशेष कौतुक केले व बांगर कुटुंबाचा गौरव केला. या प्रसंगी शहरातील नागरिक आणि भाविक मोठ्या संख्येने उपस्थित होते.