लाचलुचपत प्रतिबंधक विभागाची कामगिरी
हिंगोली (Hingoli ACB Trap) : वडिलोपार्जित शेतीच्या फेरफार करून सातबारावर नाव लावण्यासाठी 22 हजार रुपयांची लाच मागणाऱ्या खिल्लार सज्जाच्या ग्राम महसूल अधिकारी म्हणजेच तलाठ्याला लाचलुचपत प्रतिबंधक विभागाने 14 हजारांची लाच घेताना रंगेहात पकडले. हिंगोली-सेनगाव रोडवरील पुसेगाव फाटा परिसरात गुरुवार, 5 जून 2026 रोजी ही सापळा कारवाई यशस्वी करण्यात आली.
सेनगाव तालुक्यातील खिल्लार येथील 25 वर्षीय तक्रारदाराच्या वडिलांना हक्कसोड वाटणीतून 5 एकर वडिलोपार्जित शेती मिळाली होती. या शेतीचा फेरफार करून सातबारावर वडिलांचे नाव लावण्यासाठी सज्जा खिल्लारचे तलाठी रामेश्वर अर्जुन रोडगे, वय 43 यांनी 2 जून 2026 रोजी तक्रारदाराकडे 22 हजार रुपयांची मागणी केली होती. नाईलाजाने तक्रारदाराने त्याच दिवशी 8 हजार रुपये दिले. उर्वरित 14 हजार रुपये दिल्याशिवाय काम करणार नाही असे तलाठ्याने सांगितले होते.
या संदर्भात तक्रारदाराने 5 जून रोजी लाचलुचपत प्रतिबंधक विभाग, हिंगोली कार्यालयात तक्रार दिली. तक्रारीची शहानिशा करण्यासाठी त्याच दिवशी सेनगाव येथे पडताळणी करण्यात आली. पंचासमक्ष झालेल्या भेटीत तलाठी रोडगे यांनी यापूर्वी 8 हजार रुपये घेतल्याचे मान्य केले आणि उर्वरित 14 हजार रुपयांची मागणी करून आजच रक्कम स्वीकारणार असल्याचे स्पष्ट केले.
पडताळणीनंतर तातडीने सापळा रचण्यात आला. सायंकाळी हिंगोली-सेनगाव रोडवरील पुसेगाव फाटा परिसरात आरोपी तलाठी रामेश्वर रोडगे याने तक्रारदाराकडून पंचासमक्ष 14 हजार रुपये लाच स्वीकारली. त्याचवेळी लाचलुचपत प्रतिबंधक विभागाच्या पथकाने त्याला लाचेच्या रकमेसह ताब्यात घेतले.
आरोपीच्या अंगझडतीत आधार कार्ड, पॅन कार्ड, शासकीय ओळखपत्र, एसबीआय बँकेची 2 एटीएम कार्ड, व्हिवो कंपनीचा मोबाईल आणि 6,750 रुपये रोख रक्कम आढळून आली. मोबाईल हॅन्डसेट तपासणीनंतर आवश्यकतेनुसार जप्त करण्याची कार्यवाही केली जाणार आहे. सध्या आरोपीच्या घराची झडती घेण्याची प्रक्रिया सुरू आहे.
या प्रकरणी नर्सी नामदेव पोलीस ठाण्यात भ्रष्टाचार प्रतिबंध अधिनियम 1988 च्या कलम 7 अन्वये गुन्हा नोंद करण्याची प्रक्रिया सुरू आहे. गुन्हा दाखल झाल्यानंतर आरोपीस अटक केली जाणार आहे.
ही कारवाई पोलीस उप अधीक्षक विकास घनवट यांच्या मार्गदर्शनाखाली सापळा अधिकारी पोलीस निरीक्षक राजेश मलपिलु यांनी केली. या गुन्ह्याचा पुढील तपास पोलीस निरीक्षक सुलभा राऊत करीत आहेत.
