२ लाख २६ हजार ५०० रुपयांचा मुद्देमाल ताब्यात; ७० वर्षीय शेतकऱ्याला घेतले ताब्यात
मानोरा : मानोरा पोलीस स्टेशन अंतर्गत येणाऱ्या मौजे रतनवाडी येथील एका शेतात गांजाची लागवड केल्याचा प्रकार २ नोव्हेंबर रोजी उघडकीस आला. मानोरा पोलिसांनी २ लाख २६ हजार ५०० रुपये किमतीचा १५ किलो २२५ ग्रॅम गांजा जप्त केला असून, याप्रकरणी शेतकरी नारायण किसन व्यवहारे (वय ७० वर्षे) यांना ताब्यात घेतले आहे.
पोलिसांना मिळालेल्या गुप्त माहितीनुसार, रतनवाडी येथील एका शेतात गांजाची लागवड करण्यात आल्याची माहिती मिळाली होती. त्यानुसार पोलिसांनी सोमवारी सायंकाळी ५ वाजताच्या सुमारास कारंजा उपविभागीय पोलीस अधिकारी मनीष ठाकरे यांच्या मार्गदर्शनाखाली तहसीलदार राजेंद्र पाटील यांच्यासह ठाणेदार पोहेकर यांनी शेतात छापा टाकला.
यावेळी व्यवहारे यांच्या शेतात १५ किलो २२५ ग्रॅम गांजा आढळून आला. पोलिसांनी तो जप्त केला. प्रतिकिलो १५ हजार रुपये दराने जप्त गांजाची किंमत २ लाख २६ हजार ५०० रुपये असल्याची माहिती पोलिसांनी दिली आहे.
आरोपी नारायण व्यवहारे यांना ताब्यात घेऊन पोलीस ठाण्यात आणण्यात आले असून, त्यांच्याविरुद्ध कायदेशीर प्रक्रिया करण्याची कारवाई सुरू आहे.
सदर कारवाई उपविभागीय अधिकारी ठाकरे, ठाणेदार पोहेकर, फॉरेन्सिक लॅब पथकाचे उपनिरीक्षक अनिल इंगळे, पोलीस कर्मचारी राधेश्याम महल्ले, रोहन तायडे आणि गोकुळ सुषमा लोखंडे यांनी केली.