कराड तालुक्यातील शेरे गावातील घटना; विषारी औषध प्राशनानंतर उपचारादरम्यान मृत्यू, मसूर पोलिसांकडून तपास सुरू
सातारा जिल्ह्यातील कराड तालुक्यातील शेरे गावात NEET परीक्षेतील अपयशामुळे मानसिक तणावात असलेल्या १८ वर्षीय विद्यार्थिनीने आत्महत्या केल्याची दुर्दैवी घटना उघडकीस आली आहे. समीक्षा दीपक पवार असे मृत विद्यार्थिनीचे नाव असून, विषारी औषध प्राशन केल्यानंतर उपचार सुरू असताना सोमवारी तिचा मृत्यू झाला. या घटनेमुळे परिसरात हळहळ व्यक्त होत असून कुटुंबावर दुःखाचा डोंगर कोसळला आहे.
मिळालेल्या माहितीनुसार, समीक्षा दीपक पवार हिने गेल्या वर्षी NEET परीक्षा दिली होती. मात्र, निकालात अपयश आल्यापासून ती मानसिक तणाव आणि नैराश्याचा सामना करत होती. या अवस्थेतच तिने २३ जुलै रोजी उंदरांना मारण्यासाठी वापरल्या जाणाऱ्या विषारी वड्यांचे सेवन करून टोकाचे पाऊल उचलले.
घटना घडल्यानंतर सुरुवातीला तिने विषारी पदार्थ सेवन केल्याची माहिती घरातील कोणालाही दिली नव्हती. दोन दिवसांनंतर विषाचा परिणाम शरीरावर जाणवू लागला आणि तिला तीव्र पोटदुखीचा त्रास सुरू झाला. त्यानंतर तिने घडलेला प्रकार कुटुंबीयांना सांगितला.
समीक्षाची प्रकृती गंभीर झाल्यानंतर नातेवाईकांनी २६ जुलै रोजी तिला कराड येथील कृष्णा रुग्णालयात दाखल केले. डॉक्टरांकडून उपचार सुरू असतानाच सोमवारी तिची प्राणज्योत मालवली.
या घटनेमुळे कुटुंबीयांवर मोठा आघात झाला असून आई-वडिलांनी अक्षरशः टाहो फोडला. स्पर्धा परीक्षांमधील अपयशामुळे विद्यार्थ्यांवर वाढणाऱ्या मानसिक तणावाचा प्रश्न या घटनेनंतर पुन्हा एकदा ऐरणीवर आला आहे.
या प्रकरणाची नोंद करून मसूर पोलिस अधिक तपास करत आहेत.
