मानोरा तालुका परिसरात ड्रोनच्या घिरट्या; नागरिकांमध्ये भीतीचे वातावरण!

अनेक गावात हाच प्रकार; प्रशासनाने माहिती देण्याची गरज; माजी जि.प. अध्यक्ष अरविंद पाटील इंगोले यांची मागणी

मानोरा : मानोरा तालुक्यातील गिरोली, हिवरा बु., दापुरा, कारप व अनेक गावांच्या परिसरात रात्रीच्या सुमारास आकाशात संशयास्पद ड्रोन घिरट्या मारताना दिसत असल्याने नागरिकांमध्ये प्रचंड भीतीचे वातावरण निर्माण झाले आहे. रात्रीच्या वेळी हे ड्रोन दिसून येत असल्याने ते नेमके कोणत्या कारणासाठी फिरत आहेत, याबाबत उलट-सुलट चर्चा सुरू असून नागरिकांमध्ये भीतीचे वातावरण पसरले आहे. त्यामुळे नागरिक रात्रभर जागरण करीत आहेत.

सध्या मानोरा तालुक्यात चोरीच्या घटनांबाबत नागरिकांमध्ये आधीच चिंता सतावत आहे. हा प्रकार केवळ गिरोलीपुरता मर्यादित नसून मानोरा तालुक्यातील अनेक गावांच्या परिसरात हाच प्रकार घडत असल्याचे नागरिकांकडून सांगण्यात येत आहे. रात्रीच्या अंधारात लाल-हिरव्या लाईटसह फिरणारे हे ड्रोन पाहून चोरीच्या उद्देशाने तर घिरट्या घालत नाही ना, अशी भीतीही व्यक्त केली जात आहे. त्यामुळे ग्रामीण भागात रात्रीचे जागरण वाढले आहे.

या ड्रोनच्या हालचालींबाबत महसूल व पोलीस प्रशासन किंवा संबंधित यंत्रणेकडून नागरिकांना कोणतीही अधिकृत माहिती देण्यात आलेली नाही. अधिकृत माहिती न मिळाल्याने अफवांना मोठा वाव मिळत असून भीती आणखी वाढत आहे.

हे ड्रोन कोणत्या यंत्रणेकडून आणि कोणत्या कारणासाठी उडविले जात आहेत, हे स्पष्ट होणे गरजेचे आहे. शेती सर्व्हे, नकाशा मोजणी, सुरक्षा यंत्रणेची तपासणी की इतर कोणते कारण आहे, याबाबत स्पष्ट व अधिकृत माहिती स्थानिक नागरिकांना द्यावी, जेणेकरून नागरिकांमधील भीती दूर होईल. प्रशासनाने याबाबत तातडीने खुलासा करावा, अशी मागणी जिल्हा परिषदेचे माजी अध्यक्ष अरविंद पाटील इंगोले यांनी केली आहे.