छत्रपती संभाजीनगर महापालिकेची कारवाई; AIMIM नगरसेवक मतीन पटेल यांच्या मालमत्तांवरील अनधिकृत बांधकामे पाडली
छत्रपती संभाजीनगर (Bulldozer Action) : छत्रपती संभाजीनगर महापालिकेने बुधवारी AIMIM नगरसेवक मतीन पटेल यांच्या निवासस्थानासह इतर मालमत्तांवरील कथित अनधिकृत बांधकामांवर बुलडोझर चालवला. नाशिक येथील टीसीएस प्रकरणातील आरोपी निदा खानला आश्रय दिल्याप्रकरणी पटेल यांच्यावर गुन्हा दाखल करण्यात आला आहे, अशी माहिती अधिकाऱ्यांनी दिली.
निदा खानला ७ मे रोजी मध्य महाराष्ट्रातील छत्रपती संभाजीनगर येथे अटक करण्यात आली होती. पोलिसांच्या मते, ऑल इंडिया मजलिस-ए-इत्तेहादुल मुस्लिमीन (AIMIM) चे नेते मतीन पटेल यांनी तिला आश्रय दिला होता.
निदा खान ज्या घरात लपून बसली होती. त्या घराचा दरवाजा उघडला तेव्हा घरात मेणबत्त्या पडलेल्या दिसल्या. निदा खान या घरात लपलेली असताना घरातील विजेचा वापर केला जात नव्हता. कुणालाच कळून येऊ नये, यामुळे निदा खान घरातील कोणतीही लाईट चालू करत नव्हती. निदा खान घरात मेणबत्ती लावून राहत होती. आज जेव्हा पालिकेचे अधिकारी दरवाजाचा कुलूप तोडून घरात गेले, तेव्हा मेणबत्त्या आढळून आल्या.
९ मे रोजी महापालिकेने शहरातील नरेगाव परिसरातील पटेल यांच्या कथित अनधिकृत बांधकामांबाबत नोटीस बजावली होती. या नोटीसमध्ये ७२ तासांत स्पष्टीकरण देण्यास सांगण्यात आले होते. जर उत्तर मिळाले नाही, तर मालमत्तेबाबत निर्णय घेण्याचा अधिकार महापालिकेला असल्याचे नोटीसमध्ये नमूद होते.
यानंतर पटेल यांनी या प्रकरणात स्थगिती मिळवण्यासाठी न्यायालयात धाव घेतली होती, मात्र त्यांना दिलासा मिळाला नाही.
बुधवारी सकाळी महापालिकेच्या पथकाने पोलिस बंदोबस्तात पटेल यांच्या घर, कार्यालय तसेच काही दुकानांवरील अनधिकृत बांधकामे पाडली, अशी माहिती महापौर समीर राजूरकर यांनी दिली.
दरम्यान, मंगळवारी रात्री माजी AIMIM खासदार इम्तियाज जलील यांनी नरेगाव येथे पटेल यांच्या कुटुंबीयांची भेट घेत महापालिकेच्या कारवाईवर टीका केली. “आम्ही न्यायालयाकडे एका आठवड्याची मुदत मागितली होती, मात्र महापालिका घाईत कारवाई करत आहे. हा आमच्यासाठी महत्त्वाचा काळ आहे. तरीही, पाडकामानंतर आम्ही मतीन आणि त्यांच्या कुटुंबासाठी देशाला दिसेल असे घर उभारू,” असे जलील यांनी समर्थकांशी संवाद साधताना सांगितले.
महापौर राजूरकर यांनी सोमवारी सांगितले होते की, पटेल यांच्या मालमत्तेशी संबंधित कागदपत्रांची पडताळणी झाल्यानंतर त्यांचे नगरसेवक पद रद्द करण्याची प्रक्रिया सुरू केली जाईल.
“जर पटेल यांनी अनियमितता केली असेल, तर त्यांचे सदस्यत्व रद्द केले पाहिजे. महाराष्ट्र महानगरपालिका कायद्यानुसार निवडणूक अर्ज भरताना कोणतीही माहिती लपवता कामा नये,” असे ते म्हणाले होते.
दरम्यान, निदा खान ही नाशिक येथील टीसीएस युनिटमधील काही महिला सहकाऱ्यांच्या कथित धार्मिक रूपांतरण आणि लैंगिक छळ प्रकरणातील आरोपी आहे. तिला आश्रय दिल्याप्रकरणी मतीन पटेल यांनाही या प्रकरणात आरोपी करण्यात आले आहे.
नाशिक पोलिसांच्या विशेष तपास पथकाकडून (SIT) टीसीएसच्या नाशिक कार्यालयातील छेडछाड आणि अत्याचाराच्या नऊ प्रकरणांची चौकशी सुरू आहे.
टीसीएसने याप्रकरणी स्पष्ट केले आहे की, कोणत्याही प्रकारच्या छळ किंवा जबरदस्तीबाबत कंपनीची शून्य-सहनशीलता धोरण आहे. नाशिक कार्यालयातील कथित लैंगिक छळप्रकरणातील संबंधित कर्मचाऱ्यांना निलंबित करण्यात आले आहे.
