परभणी : परभणीत सध्या दुग्ध व्यवसायाशी संबंधित एक अनोखी चर्चा रंगली आहे. खंडोबा बाजार परिसरात गुजरातहून आणण्यात आलेली तब्बल ११ लाख रुपये किंमत असलेली म्हैस पशुपालक आणि नागरिकांचे लक्ष वेधून घेत आहे. या म्हशीला पाहण्यासाठी मोठी गर्दी होत असून, गुरुवार (दि. १६ जुलै) रोजी तिच्यासाठी साडेपाच लाख रुपयांपर्यंत बोली लागल्याची माहिती समोर आली आहे.
म्हैस व्यापारी शेख शोएब यांनी दिलेल्या माहितीनुसार, ही म्हैस अत्यंत धिप्पाड असून तिची उंची सुमारे ७ फुटांपेक्षा अधिक आहे. तसेच तिची लांबीही लक्षणीय असून तिची शरीरयष्टी विशेष आकर्षण ठरत आहे.
व्यापाऱ्यांच्या म्हणण्यानुसार, ही म्हैस दिवसाला तब्बल ३० लिटर दूध देण्याची क्षमता ठेवते. एका वेळेस सुमारे १५ लिटर दूध मिळते. तिची शरीरयष्टी इतकी मोठी आहे की वाहतुकीसाठी ४०७ सारख्या मोठ्या वाहनाची पूर्ण जागा व्यापावी लागते, असा दावा शेख शोएब यांनी केला आहे.
दुभत्या जनावरांना वाढती मागणी
दुग्ध व्यवसायात वाढलेली स्पर्धा तसेच शासनाने बनावट दुधाविरोधात घेतलेल्या कठोर भूमिकेमुळे बाजारात दर्जेदार दुभत्या जनावरांना चांगला भाव मिळत आहे. सध्या दुधाला प्रतिलिटर १२० रुपयांपर्यंत दर मिळत असल्याने शेतकरी आणि पशुपालकांचा कल उच्च दर्जाच्या म्हशी खरेदी करण्याकडे वाढला आहे.
पशुपालकांची मोठी गर्दी
सदर म्हैस पाहण्यासाठी आणि खरेदीसाठी परभणीसह जिल्ह्याबाहेरील पशुपालकही मोठ्या संख्येने येत आहेत. जरी म्हशीची किंमत ११ लाख रुपये सांगण्यात येत असली, तरी किमान ७ लाख रुपयांपर्यंत विक्री करण्याचा मानस असल्याचे म्हैस व्यापारी शेख शोएब यांनी व्यक्त केले.
