रिलायन्स ग्रुपवर ईडीची पुन्हा मोठी कारवाई; एम्ब्रायर लेगसी ६५० आणि डसॉल्ट फाल्कन २००० विमाने जप्त, एकूण जप्त मालमत्तेचा आकडा २३ हजार कोटींवर
उद्योगपती अनिल अंबानी यांच्या रिलायन्स समूहाभोवती तपास यंत्रणांचा फास आणखी घट्ट झाला आहे. कथित आर्थिक गैरव्यवहार आणि मनी लाँड्रिंग प्रकरणांच्या तपासादरम्यान अंमलबजावणी संचालनालयाने (ED) रिलायन्स ग्रुपची ५१० कोटी रुपयांची मालमत्ता जप्त केली आहे. या कारवाईत दोन आलिशान खासगी विमानांसह स्थावर मालमत्ता, पवनचक्क्या, बँक ठेवी आणि विविध गुंतवणुकींचा समावेश आहे. या ताज्या कारवाईनंतर अनिल अंबानी समूहाची आतापर्यंत जप्त करण्यात आलेल्या मालमत्तेची एकूण किंमत २३ हजार कोटी रुपयांवर पोहोचली आहे. ईडीने मंगळवारी यासंदर्भातील माहिती दिली.
ईडीच्या कारवाईत एम्ब्रायर लेगसी ६५० आणि डसॉल्ट फाल्कन २००० या दोन खासगी विमानांवर जप्ती आणण्यात आली आहे. याशिवाय सहा फ्लॅट, जमीन, पवनऊर्जा प्रकल्प, बँक खात्यांमधील रक्कम आणि इतर आर्थिक गुंतवणुकींवरही कारवाई करण्यात आली आहे. बँकांमधील कथित घोटाळे, निधीचा गैरवापर आणि भारतातून परदेशातील करव्यवस्थेशी संबंधित व्यवहारांमध्ये आर्थिक हेराफेरी झाल्याच्या आरोपांची चौकशी या प्रकरणांत केली जात आहे.
५१० कोटींच्या कारवाईत दोन विमानांचा समावेश
ईडीच्या माहितीनुसार, रिलायन्स होम फायनान्स लिमिटेड (RHFL) आणि रिलायन्स कमर्शियल फायनान्स लिमिटेड (RCFL) यांच्याशी संबंधित कथित आर्थिक गैरव्यवहाराची रक्कम २६३.०५ कोटी रुपये आहे. तर रिलायन्स कम्युनिकेशन्स लिमिटेड (RCom) संदर्भात २४७.१२ कोटी रुपयांच्या कथित घोटाळ्याची चौकशी सुरू आहे.
आरकॉम प्रकरणात ईडीने महाराष्ट्रातील दोन चार्टर्ड विमाने, सहा भूखंड आणि कार्यालयीन जागा जप्त केली आहे. जप्त केलेल्या विमानांमध्ये डसॉल्ट फाल्कन २००० आणि एम्ब्रायर लेगसी ६५० यांचा समावेश आहे.
दुसरीकडे, आरएचएफएल आणि आरसीएफएलशी संबंधित प्रकरणांमध्ये तामिळनाडूमधील दोन पवनचक्क्या, बँक खात्यांतील शिल्लक रक्कम, मुदत ठेवी (FD) आणि अन्य आर्थिक गुंतवणुकींवर ईडीने कारवाई केली आहे.
CBI आणि पोलिसांच्या FIR वरून तपासाला सुरुवात
या आर्थिक गैरव्यवहारांचा तपास सुरू करण्यासाठी केंद्रीय अन्वेषण विभाग (CBI), दिल्ली पोलीस आणि मुंबई पोलिसांच्या आर्थिक गुन्हे शाखेने (EOW) दाखल केलेल्या विविध एफआयआरचा आधार घेण्यात आला आहे. या तक्रारींमधील आरोपांच्या आधारे ईडीने मनी लाँड्रिंग प्रतिबंधक कायद्यांतर्गत तपास सुरू केला.
याशिवाय परकीय चलन व्यवस्थापन कायद्यांतर्गत (FEMA) आणखी दोन स्वतंत्र प्रकरणांची चौकशीही ईडीकडून केली जात आहे.
रिलायन्स समूहातील अनेक कंपन्या तपासाच्या कक्षेत
ईडीच्या तपासाचा विस्तार रिलायन्स समूहातील विविध कंपन्यांपर्यंत झाला आहे. यामध्ये रिलायन्स कम्युनिकेशन लिमिटेड, रिलायन्स होम फायनान्स लिमिटेड, रिलायन्स कमर्शियल फायनान्स लिमिटेड, रिलायन्स इन्फ्रास्ट्रक्चर लिमिटेड, रिलायन्स पॉवर लिमिटेड आणि रिलायन्स कॅपिटल लिमिटेड या कंपन्यांचा समावेश आहे.
दरम्यान, नव्या जप्तीमुळे अनिल अंबानी यांच्या रिलायन्स समूहावरील आर्थिक तपासाची व्याप्ती पुन्हा चर्चेत आली आहे. दोन खासगी विमानांसह शेकडो कोटींच्या मालमत्तेवर झालेली ही कारवाई समूहासाठी मोठा धक्का मानली जात आहे.