500 Crore Audio Clip

मनोज जरांगेंच्या ५०० कोटींच्या ऑडिओ क्लिपची SIT चौकशी; क्लिप देण्यास तयारी, मात्र जरांगेंनी घातली मोठी अट!

मनोज जरांगेंच्या ५०० कोटींच्या ऑडिओ क्लिपची SIT चौकशी! क्लिप देण्यास तयारी, मात्र स्रोत सांगण्यापूर्वी सुरक्षेची हमी मागितली.

मनोज जरांगेंच्या ५०० कोटींच्या ऑडिओ क्लिपची SIT चौकशी; क्लिप देण्यास तयारी, मात्र जरांगेंनी घातली मोठी अट!

ऑडिओ क्लिपचा स्रोतही तपास यंत्रणेला सांगणार; मात्र माहिती देणाऱ्या व्यक्तीच्या सुरक्षेची मुख्यमंत्री देवेंद्र फडणवीस आणि एकनाथ शिंदेंनी हमी द्यावी, अशी मागणी

मुंबई : मराठा आरक्षण आंदोलनाचे नेते मनोज जरांगे पाटील यांनी ५०० कोटी रुपयांच्या आर्थिक व्यवहारासंदर्भातील ऑडिओ क्लिप सार्वजनिक केल्यानंतर महाराष्ट्राच्या राजकारणात मोठी खळबळ उडाली आहे. या क्लिपमधील संभाषणावरून भाजप आणि शिवसेनेमध्ये आरोप-प्रत्यारोप सुरू झाले होते. आता या प्रकरणाच्या मुळाशी जाण्यासाठी विशेष तपास पथकाची (SIT) नियुक्ती करण्यात आली असून, तपास यंत्रणेने जरांगे पाटील यांच्याशी संपर्क साधला आहे.

या ऑडिओ क्लिपमध्ये मनोज जरांगे पाटील यांना ५०० कोटी रुपये दिल्याचा उल्लेख असल्याचा दावा करण्यात आला होता. यावर प्रतिक्रिया देताना आपल्या नावाचा वापर करून भाजपकडून कोणी पैसे घेतले आहेत का आणि प्रत्यक्षात आपल्याला ही रक्कम मिळाली आहे का, असा सवाल जरांगे यांनी उपस्थित केला होता.

पत्रकार परिषदेत ऑडिओ क्लिप ऐकवल्यानंतर चौकशी समितीने जरांगे यांना पत्र पाठवून संबंधित ध्वनिफीत तपासासाठी सादर करण्याची मागणी केली. त्यावर क्लिप तपास यंत्रणेकडे देण्याची तयारी त्यांनी दर्शवली आहे. एवढेच नव्हे, तर ऑडिओ क्लिप नेमकी कुठून मिळाली, याचा स्रोतही सांगण्याची तयारी असल्याचे त्यांनी स्पष्ट केले.

ऑडिओ क्लिप देण्यास तयारी; जरांगेंची सुरक्षेची अट

संबंधित ऑडिओ क्लिपचा स्रोत तपास अधिकाऱ्यांना सांगण्यास आपली हरकत नसल्याचे मनोज जरांगे पाटील यांनी म्हटले आहे. मात्र, ज्या व्यक्तीकडून ही क्लिप मिळाली आहे, तिच्या जीविताला कोणताही धोका निर्माण होणार नाही, याची खात्री सरकारने द्यावी, अशी त्यांची मागणी आहे.

मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी संबंधित व्यक्तीच्या सुरक्षेची जबाबदारी घ्यावी. तिच्या जीवाला धोका निर्माण होणार नाही, याची शाश्वती मिळाल्यानंतरच पुढील माहिती देणार असल्याचे जरांगे यांनी माध्यमांशी बोलताना स्पष्ट केले.

शैलेश बलकवडे यांच्या अध्यक्षतेखाली तीन सदस्यीय SIT

या प्रकरणाचे गांभीर्य लक्षात घेऊन मुख्यमंत्री देवेंद्र फडणवीस यांनी मुंबई पोलीस आयुक्तांना विशेष तपास पथक स्थापन करण्याचे निर्देश दिले होते. त्यानुसार अप्पर पोलीस आयुक्त शैलेश बलकवडे यांच्या नेतृत्वाखाली तीन सदस्यीय विशेष तपास पथकाची नियुक्ती करण्यात आली आहे.

या समितीकडून ऑडिओ क्लिपची सत्यता, त्यातील संभाषण आणि त्यामागील व्यक्तींची माहिती तपासली जाणार आहे. क्लिपमधील दाव्यांमागे नेमके तथ्य काय आहे, याचा शोध घेण्याचे आव्हान तपास यंत्रणेसमोर आहे.

खासदार श्रीकांत शिंदे यांच्या नावाचाही उल्लेख

संबंधित ऑडिओ क्लिपमध्ये खासदार श्रीकांत शिंदे यांच्या माध्यमातून मनोज जरांगे पाटील यांना ५०० कोटी रुपये देण्यात आल्याचा कथित उल्लेख असल्याचा दावा करण्यात आला होता. या दाव्यामुळे राजकीय वातावरण तापले होते.

या संपूर्ण प्रकरणाची कोणत्याही राजकीय दबावाशिवाय निष्पक्ष चौकशी व्हावी आणि ऑडिओ क्लिपमागे असलेल्या सूत्रधारांची ओळख उघड व्हावी, अशी मागणी जरांगे पाटील यांनी सरकारकडे केली आहे.

आता जरांगे पाटील यांच्याकडून ऑडिओ क्लिप आणि तिचा स्रोत तपास यंत्रणेला कधी उपलब्ध करून दिला जातो, तसेच एसआयटीच्या चौकशीतून कोणती माहिती समोर येते, याकडे राजकीय वर्तुळाचे लक्ष लागले आहे.


 

संबंधित सामग्री

यवतमाळमध्ये भूकंपाचे धक्के! एकलासपूरमध्ये ३ रिश्टर स्केलची नोंद; नागरिकांमध्ये भीती

यवतमाळमध्ये भूकंपाचे धक्के! एकलासपूरमध्ये ३ रिश्टर स्केलची नोंद; नागरिकांमध्ये भीती

यवतमाळच्या एकलासपूरमध्ये ३ रिश्टर स्केलचा भूकंप! नागरिकांमध्ये भीती, सुदैवाने कोणतीही जीवित किंवा वित्तहानी नाही.

Nov 09, 2026
वंचितांसोबत दिवाळीचा आनंद! आमदार श्वेता महाले यांनी सेवा संकल्पमध्ये साजरा केला सण

वंचितांसोबत दिवाळीचा आनंद! आमदार श्वेता महाले यांनी सेवा संकल्पमध्ये साजरा केला सण

आमदार श्वेता महाले यांनी सेवा संकल्पमध्ये वंचितांसोबत दिवाळी साजरी करत फराळ, कपड्यांचे वाटप आणि वृक्षारोपण केले.

Nov 09, 2026
गोकुळ दूध संघ निवडणुकीत लोकशाहीची गळचेपी?

गोकुळ दूध संघ निवडणुकीत लोकशाहीची गळचेपी?

गोकुळ दूध संघातील नियुक्त सदस्यांच्या मतदानाच्या अधिकाराविरोधात मानोरा काँग्रेस आक्रमक; शासन निर्णय रद्द करून अध्यक्षपदाची निवडणूक घेण्याची मागणी.

Nov 09, 2026
दिवाळीच्या फटाक्यांमुळे लातूरमध्ये आगीच्या आठ घटना; ३० जवानांकडून युद्धपातळीवर बचावकार्य

दिवाळीच्या फटाक्यांमुळे लातूरमध्ये आगीच्या आठ घटना; ३० जवानांकडून युद्धपातळीवर बचावकार्य

लातूरमध्ये दिवाळीच्या फटाक्यांमुळे आठ ठिकाणी आग; ३० जवान आणि आठ अग्निशमन वाहनांच्या तत्परतेमुळे मोठी दुर्घटना टळली.

Nov 09, 2026
मानोऱ्यात मनोज जरांगे पाटलांचे जंगी स्वागत; समाजबांधव आणि शेतकऱ्यांची मोठी उपस्थिती

मानोऱ्यात मनोज जरांगे पाटलांचे जंगी स्वागत; समाजबांधव आणि शेतकऱ्यांची मोठी उपस्थिती

मनोज जरांगे पाटील यांचे मानोरा शहरात आगमन होताच समाजबांधव आणि शेतकऱ्यांनी जंगी स्वागत केले. यावेळी नागरिकांची मोठी उपस्थिती होती.

Nov 09, 2026