Mountaineer Nipun Aggarwal: १३ वर्षीय निपुण अग्रवालने एव्हरेस्ट बेस कॅम्पवर यशस्वी गिरीरोहण केले, त्याने मराठवाड्यातील सर्वात कमी वयाचा गीर्यारोहक म्हणून इतिहास रचला.
मराठवाड्यातील सर्वात कमी वयाचा गिर्यारोहक;१३ व्या वर्षीच गाठला टप्पा
हिंगोली (Mountaineer Nipun Aggarwal) : जिद्द, मेहनत आणि दुर्दम्य इच्छाशक्तीच्या जोरावर हिंगोलीच्या निपुण अनुप निकिता अग्रवाल या १३ वर्षीय मुलाने २४ मे २०२६ रोजी एव्हरेस्ट बेस कॅम्प (Eँण्) यशस्वीरित्या सर केला आहे. ५,३६४ मीटर / १७,५९८ फूट उंचीवर, जिथे हवेत केवळ ५०टक्के ऑक्सिजन असतो, अशा जगातील सर्वात खडतर ट्रेक्सपैकी एक असलेल्या मोहिमेत निपुणने इतिहास रचला. या कामगिरीसह निपुणच्या नावे अनेक विक्रम नोंदवले गेले आहेत. मराठवाड्यातून इबीसी गाठणारा सर्वात कमी वयाचा व्यक्ती म्हणून निपुन अग्रवालची ओळख सर्वदुर झाली आहे.५,३६४ मीटर उंची गाठणारा अग्रवाल कुटुंबातील सर्वात कमी वयाचा सुपुत्र आहे.हिंगोली जिल्ह्यातून एवढ्या कमी वयात इबीसी गाठणारा पहिला भूमिपुत्र ठरला आहे.
गेल्या एक वर्षापासून निपुणने या मोहिमेसाठी अथक परिश्रम घेतले. पहाटे लवकर उठून केलेला सराव, कडक शिस्त आणि जिद्द याच्या जोरावर त्याने हे यश संपादन केले. बेस कॅम्पवर भारताचा तिरंगा छातीवर लावून उभ्या असलेल्या निपुणचा फोटो सध्या सर्वांचे लक्ष वेधून घेत आहे.
निपुणचे (Mountaineer Nipun Aggarwal) आजोबा अॅड. आर. एन. अग्रवाल आणि आजी सरोज अग्रवाल यांनी आनंद व्यक्त करताना सांगितले, 'आमच्या संपूर्ण कुटुंबासाठी हा अभिमानाचा आणि कृतज्ञतेचा क्षण आहे. निपुणने वयाच्या १३व्या वर्षीच एक मोठा टप्पा गाठला आहे. त्याने दाखवून दिले की वय हे केवळ एक आकडा आहे आणि दृढनिश्चय असेल तर काहीही अशक्य नाही. निपुणच्या या यशामुळे हिंगोली जिल्ह्यासह संपूर्ण मराठवाड्यातून त्याच्यावर अभिनंदनाचा वर्षाव होत आहे.