Wild Boar Attack: शेतकरी अन्नपूर्णा चव्हाण यांचा रानडुकराचा अचानक हल्ल्यात जिवाची बचत कुतर्या धाडसाने झाली. तिची गंभीर जखमांवर उपचार सुरू आहेत.
हिंगोली (Wild Boar Attack) : जिल्ह्यातील मौजे वडचुना येथे शेतात काम करत असलेल्या एका महिलेवर रानडुकराने अचानक हल्ला केल्याची धक्कादायक घटना घडली. या हल्ल्यात महिला गंभीर जखमी झाली असून, एका कुत्र्याच्या धाडसामुळे तिचा जीव थोडक्यात बचावल्याची माहिती समोर आली आहे.
मिळालेल्या माहितीनुसार, वडचुना येथील रहिवासी अन्नपूर्णा गजानन चव्हाण या आपल्या शेतात नेहमीप्रमाणे शेतीची कामे करत होत्या. याच वेळी अचानक रानडुकराने त्यांच्यावर हल्ला चढवला. या हल्ल्यात त्यांच्या पायावर, कमरेवर तसेच शरीराच्या इतर भागांवर गंभीर जखमा झाल्या. हल्ला सुरू असतानाच परिसरातील एका कुत्र्याने मोठ्याने भुंकत रानडुकरावर धाव घेतली. त्यामुळे रानडुकराने तेथून पळ काढला आणि महिलेचा जीव वाचला. घटनेनंतर स्थानिक ग्रामस्थांनी तत्काळ धाव घेऊन जखमी अन्नपूर्णा चव्हाण यांना उपचारासाठी हिंगोली येथील जिल्हा सामान्य रुग्णालयात दाखल केले. सध्या त्यांच्यावर उपचार सुरू असून प्रकृतीवर वैद्यकीय पथक लक्ष ठेवून आहे.
या (Wild Boar Attack) घटनेमुळे वडचुना परिसरातील शेतकरी आणि शेतमजुरांमध्ये भीतीचे वातावरण निर्माण झाले आहे. परिसरात रानडुकरांचा वाढता वावर लक्षात घेता वन विभागाने तातडीने उपाययोजना करून शेतकर्यांच्या सुरक्षिततेची खबरदारी घ्यावी, तसेच रानडुकरांचा बंदोबस्त करावा, अशी मागणी ग्रामस्थांनी केली आहे.