हिंगोली मध्ये कयाधू नदीतील कामादरम्यान मुख्य जलवाहिनी फुटली; शहराचा पाणीपुरवठा उशिराने होणार

हिंगोली (Water Pipeline Burst) : कयाधू नदीमध्ये सुरू असलेल्या खोलीकरणाच्या कामादरम्यान हिंगोली शहराला पाणीपुरवठा करणारी मुख्य शुद्ध जलवाहिनी फुटल्याची घटना घडली आहे. या घटनेमुळे उद्या, मंगळवारी शहरातील पाणीपुरवठा उशिराने होणार असल्याची माहिती हिंगोली नगर परिषदेने दिली आहे.

नगर परिषद, हिंगोली यांच्यामार्फत जलवाहिनी दुरुस्तीचे काम युद्धपातळीवर हाती घेण्यात आले आहे. सध्या दुरुस्तीचे काम प्रगतीपथावर असून ते पूर्ण होताच शहराचा पाणीपुरवठा पूर्ववत व सुरळीत करण्यात येईल, असे प्रशासनाने स्पष्ट केले आहे.

दरम्यान, दुरुस्तीचे काम पूर्ण होईपर्यंत नागरिकांनी आवश्यकतेनुसार पाण्याचा जपून व काटकसरीने वापर करावा. तसेच या कालावधीत नागरिकांनी नगर परिषदेस सहकार्य करावे, असे आवाहन प्रशासनाकडून करण्यात आले आहे.