दक्षिण पूर्व मध्य रेल्वे अंतर्गत गोंदिया स्थानकावरील रेल्वे ट्रॅकच्या नूतनीकरणाची कामे हाती घेण्यात आली आहेत.
नागपूर (Vidarbha Express) : दक्षिण पूर्व मध्य रेल्वे अंतर्गत गोंदिया स्थानकावरील रेल्वे ट्रॅकच्या नूतनीकरणाची कामे हाती घेण्यात आली आहेत. या कामांमुळे रेल्वे प्रशासनाने गाड्यांच्या वेळापत्रकात बदल केले असून सीएसएमटी-गोंदिया-सीएसएमटी विदर्भ एक्स्प्रेस आता 23 मे पर्यंत गोंदियाऐवजी नागपूर स्थानकापर्यंतच धावणार असल्याचा निर्णय घेण्यात आला आहे.
कसं असेल वेळापत्रक?
विदर्भ एक्स्प्रेस क्रमांक 12105/12106 मुंबईच्या छत्रपती शिवाजी महाराज टर्मिनस (सीएसएमटी) ते गोंदियापर्यंत धावते. मात्र, गोंदिया स्थानकावर सुरू असलेल्या कामांमुळे गाडी क्रमांक 12105 आता नागपूरच्या मुख्य रेल्वे स्थानकावर अंतिम थांबा घेणार आहे.
परतीच्या प्रवासात गाडी क्रमांक 12106 विदर्भ एक्स्प्रेस गोंदियाऐवजी नागपूर स्थानकावरूनच मुंबईसाठी (सीएसएमटी) सुटेल.
गोंदिया स्थानकावर इंटरलॉकिंग, प्लॅटफॉर्मचा विस्तार आणि नवीन मार्गांची जोडणी यांसारखी महत्त्वाची कामे सुरू आहेत.
इतर गाड्यांवरही परिणाम
या कामांमुळे गोंदियाकडे जाणाऱ्या रेल्वे वाहतुकीत काही प्रमाणात बदल करण्यात आला आहे. केवळ विदर्भ एक्स्प्रेसच नव्हे, तर अन्य काही गाड्यांच्या फेऱ्यांवरही याचा परिणाम होणार आहे.
काही रेल्वेगाड्यांचे मार्ग बदलण्यात आले आहेत, तर काहींना पर्यायी थांबे देण्यात आले आहेत.
प्रवाशांची मोठी गैरसोय
विदर्भ एक्स्प्रेस काही दिवस गोंदियाऐवजी नागपूर स्थानकावरच थांबणार असल्याने गोंदिया, तुमसर आणि भंडारा येथील प्रवाशांना मोठ्या गैरसोयीचा सामना करावा लागणार आहे.
नागपूर-गोंदिया मार्गावर प्रवाशांसह व्यावसायिक, शेतकरी आणि मालवाहतुकीची मोठी हालचाल असते. त्यामुळे या बदलाचा परिणाम अनेकांवर होणार आहे.
रेल्वे प्रशासनाचे आवाहन
विदर्भ एक्स्प्रेसने प्रवास करणाऱ्या प्रवाशांनी रेल्वेचे अधिकृत ॲप किंवा वेबसाइट तपासूनच प्रवासाचे नियोजन करावे, असे आवाहन रेल्वे प्रशासनाकडून करण्यात आले आहे.
स्थानकावरील कामे पूर्ण झाल्यानंतर विदर्भ एक्स्प्रेस पुन्हा पूर्ववत गोंदियापर्यंत धावू लागेल, असेही प्रशासनाने स्पष्ट केले आहे.
तात्पुरता निर्णय, सुरक्षिततेसाठी आवश्यक
३ मे ते २३ मेदरम्यान ही ट्रेन नागपूरातील अजनीपर्यंतच धावणार आहे. रेल्वे ट्रॅकच्या नूतनीकरणाच्या कामांमुळे हा निर्णय घेणे आवश्यक असल्याचे रेल्वे प्रशासनाने सांगितले आहे. भविष्यात या मार्गावरील प्रवास अधिक सुरक्षित आणि सुलभ करण्यासाठी ही कामे केली जात आहेत.