दिना नदीत मासेमारीदरम्यान इसमाचा बुडून मृत्यू

वरुर येथील घटना; गावात हळहळ व्यक्त

घोट (Varur Youth death) : चामोर्शी तालुक्यातील वरुर येथील वसंत हरी चापले (वय ६० वर्ष) यांचा नजीकच्या दिना नदीत बुडून दुर्दैवी मृत्यू झाल्याची घटना उघडकीस आली आहे. मिळालेल्या माहितीनुसार, दि. ०७ मे २०२६ रोजी दुपारी सुमारे १२ वाजताच्या सुमारास वसंत चापले हे गावातील काही इसमांसोबत वरुर येथून सुमारे ३ किलोमीटर अंतरावरील दिना नदीवर मासेमारीसाठी गेले होते. मासेमारीदरम्यान ते नदीतील खोल डोहात गेल्यानंतर बाहेर आले नाहीत.

सोबत असलेल्या व्यक्तींनी त्यांचा शोध घेण्याचा प्रयत्न केला, मात्र ते आढळून आले नाहीत. दरम्यान, सायंकाळी हवामानात अचानक बदल होऊन वादळी वाऱ्यासह पाऊस सुरू झाल्याने शोधकार्य थांबवावे लागले. आज दि. ०८ मे रोजी सकाळी गावकऱ्यांच्या मदतीने पुन्हा शोधमोहीम राबविण्यात आली. यावेळी वसंत चापले यांचा मृतदेह नदीतील डोहात आढळून आला. गावातील मारोती चौधरी यांनी मृतदेह पाण्याबाहेर काढून नदीकाठी आणला.

या (Varur Youth death) घटनेची माहिती घोट पोलीस मदत केंद्रात देण्यात आली असून घोट पोलिसांनी मर्ग दाखल केला आहे. सहाय्यक पोलीस निरीक्षक किशोर शिंदे यांच्या मार्गदर्शनाखाली पुढील कारवाई सुरू आहे. या दुर्दैवी घटनेमुळे वरुर परिसरात हळहळ व्यक्त करण्यात येत आहे.