लिखित आश्वासनानंतर उपोषण मागे; मुख्याधिकारी व नगराध्यक्षांच्या हस्ते ज्यूस पाजून उपोषणाची सांगता

रिसोड (Risod Hunger strike) : कालुशा बाबा दर्गा जवळ सुरू असलेल्या कथित अनाधिकृत बांधकामाविरोधात सुरू करण्यात आलेले आमरण उपोषण प्रशासनाकडून लिखित आश्वासन मिळाल्यानंतर मंगळवार, 28 जुलै रोजी मागे घेण्यात आले. नगरपरिषदेचे मुख्याधिकारी सतीश शेवदा आणि नगराध्यक्ष भगवानदादा क्षिरसागर यांनी उपोषणकर्त्यांना ज्यूस पाजून उपोषणाची सांगता केली.कालुशा बाबा दर्गाजवळ सुरू असलेले कथित अनाधिकृत बांधकाम तातडीने थांबवून त्याबाबत योग्य ती कार्यवाही करावी, या मागणीसाठी मोहसीन खान, शेख तबजरोद्दीन, शेख सलीम आणि शेख कामील यांनी 27 जुलै रोजी आमरण उपोषण सुरू केले होते.

या (Risod Hunger strike) आंदोलनामुळे परिसरात नागरिकांचे लक्ष वेधले गेले होते.उपोषणाच्या दुसऱ्या दिवशी प्रशासन आणि उपोषणकर्त्यांमध्ये चर्चा झाली. यावेळी संबंधित प्रकरणात आवश्यक ती कार्यवाही करण्यात येईल, असे लिखित आश्वासन प्रशासनाकडून देण्यात आले. त्यानंतर उपोषणकर्त्यांनी आपले आंदोलन मागे घेण्याचा निर्णय घेतला.मुख्याधिकारी सतीश शेवदा आणि नगराध्यक्ष भगवानदादा क्षिरसागर यांनी उपोषणकर्त्यांना ज्यूस पाजून उपोषण सोडविले. यावेळी नगरसेवक सतीश इरतकर, अरुण क्षिरसागर, शेख अजीज यांच्यासह परिसरातील अनेक नागरिक मोठ्या संख्येने उपस्थित होते.या प्रकरणातील प्रशासनाच्या लिखित आश्वासनामुळे आंदोलनाची तात्पुरती सांगता झाली असून, आता संबंधित अनाधिकृत बांधकामाबाबत प्रत्यक्षात कोणती कार्यवाही होते, याकडे नागरिकांचे लक्ष लागले आहे.