नगर परिषदेने मालमत्ता करात केलेल्या प्रचंड आणि अवाजवी वाढीविरोधात शहरातील १६ विविध संस्था, संघटना तसेच सामाजिक कार्यकर्त्यांनी तीव्र संताप व्यक्त केला होता.
खामगाव (Tax Protest) : नगर परिषदेने मालमत्ता करात केलेल्या प्रचंड आणि अवाजवी वाढीविरोधात शहरातील १६ विविध संस्था, संघटना तसेच सामाजिक कार्यकर्त्यांनी तीव्र संताप व्यक्त केला होता. या पार्श्वभूमीवर शिवसेना (शिंदे गट) यांनी हा मुद्दा लावून धरत व्यापाऱ्यांची बैठक आयोजित केली. या बैठकीत केंद्रीय मंत्री तथा जिल्ह्याचे खासदार प्रतापराव जाधव यांच्याकडे उपमुख्यमंत्री व नगरविकास मंत्री एकनाथ शिंदे यांच्यामार्फत या करवाढीला स्थगिती मिळवून देण्याची ठाम मागणी करण्यात आली होती.
या मागणीनंतर प्रतापराव जाधव यांनी एकनाथ शिंदे यांच्याकडे पाठपुरावा करून मालमत्ता कर वाढीला स्थगिती मिळवून दिली आहे. नगर परिषदेकडून करण्यात आलेली करवाढ ही काही टक्क्यांमध्ये नसून तब्बल आठ ते पंधरा पट इतकी असल्याचा आरोप नागरिकांकडून करण्यात आला होता. ही वाढ रद्द करण्यासाठी शहरात आंदोलन उभारण्यात आले होते.
या करवाढविरोधी आंदोलनात दैनिक ‘देशोन्नती’नेही महत्त्वाची भूमिका बजावली. वृत्तपत्राने वेळोवेळी सविस्तर बातम्या प्रसिद्ध करून या प्रश्नाला व्यापक स्वरूप दिले. त्यामुळे या चळवळीला अधिक बळ मिळाले, अशी प्रतिक्रिया नागरिकांकडून व्यक्त होत आहे.
दरम्यान, करवाढीला स्थगिती मिळाल्यानंतर खामगावकरांनी प्रतापराव जाधव, एकनाथ शिंदे तसेच स्थानिक शिवसेना (शिंदे गट) नेते अॅड. अमोल अंधारे, तालुका प्रमुख राजेंद्र बघे आणि त्यांच्या सहकाऱ्यांचे आभार मानले आहेत. यासोबतच दैनिक ‘देशोन्नती’चेही विशेष आभार व्यक्त करण्यात आले.
विशेष म्हणजे, ‘देशोन्नती’ने प्रकाशित केलेल्या १२ महत्त्वाच्या बातम्यांची कात्रणे एकत्र करून शहरात होर्डिंगवर प्रदर्शित करण्यात आली आहेत. या माध्यमातून आंदोलनात वृत्तपत्राच्या योगदानाची दखल घेतली गेली असून, जनआंदोलनातील प्रभावी माध्यम म्हणून ‘देशोन्नती’ने आपले स्थान पुन्हा अधोरेखित केले आहे.