“अब्बू, मला घरी घेऊन जा”; मुलीच्या शेवटच्या फोननंतर काही तासांत मृत्यू

अमरावती (Suspicious Death Case) : अमरावती येथील सौदागरपुरा परिसरातील १९ वर्षीय फाजीला जबील मोहम्मद जुबेर हिच्या संशयास्पद मृत्यूने खळबळ उडाली आहे. विवाहानंतर फाजीला ही नागपूर येथील गोरियानगर, मोमीनपुरा परिसरात सासरी राहत होती. मात्र सासरच्या मंडळींकडून सतत त्रास दिला जात असल्याची माहिती तिने वारंवार आपल्या वडील आणि भावाला फोनवरून दिली होती.

१५ मे रोजी “अब्बू, मला लवकर अमरावतीला घेऊन जा,” असा फाजीला हिचा शेवटचा फोन माहेरच्या कुटुंबीयांना आला होता. मात्र त्यानंतर काही वेळातच फाजीला हिचे हृदयविकाराच्या झटक्याने निधन झाल्याची माहिती सासरच्या मंडळींकडून देण्यात आली.

मुलीच्या मृत्यूची माहिती मिळताच आई-वडील नागपूरला पोहोचले. त्यावेळी फाजीला हिचा मृतदेह पांढऱ्या कपड्यात गुंडाळलेल्या अवस्थेत होता. तसेच तत्काळ दफनविधी करण्याची घाई सासरच्या मंडळींकडून करण्यात येत असल्याचा आरोप कुटुंबीयांनी केला आहे.

दरम्यान, मृतदेह अमरावती येथे आणल्यानंतर आंघोळ घालताना फाजीला हिच्या गळ्यावर व्रण दिसून आल्याने संशय अधिक बळावला. यानंतर शेकडो नातेवाईकांनी नागपुरी गेट पोलीस ठाण्यात धाव घेत कारवाईची मागणी केली.

यानंतर १७ मे रोजी नायब तहसीलदार टीना चव्हाण आणि अधिकाऱ्यांच्या उपस्थितीत कब्र उकरून फाजीला हिचा मृतदेह बाहेर काढण्यात आला. जिल्हा सामान्य रुग्णालयात पुन्हा शवविच्छेदन करण्यात आले. या प्राथमिक अहवालात गळा आवळणे किंवा श्वसनक्रिया बंद पडल्याने मृत्यू झाल्याचा उल्लेख करण्यात आल्याने प्रकरणाला गंभीर वळण मिळाले आहे.

कुटुंबातील व्यक्तींवर संशय

फाजीला हिच्या दिराची पत्नी गर्भवती असल्याने ती माहेरी गेली होती. त्यानंतर दीर फाजीला हिच्यावर वाईट नजर ठेवत असल्याची माहिती तिने आपल्या भावाला फोनवरून दिल्याचा दावा तक्रारीत करण्यात आला आहे.

या प्रकरणी नागपूरमधील तहसील पोलीस ठाण्यात मृत महिलेच्या भावाच्या तक्रारीवरून पती मोहम्मद जुबेर, दीर मोहम्मद इरफान मोहम्मद जलील आणि सासरे मोहम्मद जलील उर्फ संजू पटेल यांच्याविरोधात गुन्हा दाखल करण्यात आला असून पुढील तपास पोलिसांकडून सुरू आहे.