गुन्ह्याचा छडा लावल्याबद्दल पोलीस उपनिरीक्षक शेख खुद्दुस यांचा पोलीस अधीक्षक डॉक्टर निलाभ रोहन यांच्याकडून गौरव

जवळा बाजार (PSI Sheikh Khuddus) : एक मे रोजी रात्री 8.30 ते 2 मे रोजी सकाळी 6 वाजेच्या दरम्यान औंढा नागनाथ पोलीस ठाण्याच्या हद्दीतील जवळा बाजार येथे देण्या-घेण्याच्या वादातून अज्ञात हत्याराने डोक्यात वार करून एकाचा खून करण्यात आला. या प्रकरणी औंढा नागनाथ पोलीस ठाण्यात गुन्हा दाखल करण्यात आला होता.

आरोपी खून करून शेतात लपून बसल्याची गोपनीय माहिती मिळाल्यानंतर पोलीस उपनिरीक्षक शेख खुद्दुस (PSI Sheikh Khuddus) यांनी हिंगोली सायबर सेलच्या तांत्रिक साह्याने आधुनिक तंत्रज्ञानाचा वापर केला. ड्रोनद्वारे शेत परिसराची पाहणी करून आरोपीचा शोध घेण्यात आला व अवघ्या 48 तासांच्या आत आरोपीस अटक करून जेरबंद करण्यात आले.

या उल्लेखनीय कामगिरीबद्दल हिंगोलीचे पोलीस अधीक्षक डॉ. निलाभ रोहन यांनी पोलीस उपनिरीक्षक शेख खुद्दुस (PSI Sheikh Khuddus) यांचा प्रशस्तीपत्र देऊन गौरव केला. आपण केलेल्या कामगिरीबद्दल मनःपूर्वक अभिनंदन करीत आहोत. भविष्यातही आपण अशीच उत्कृष्ट कामगिरी करून पोलीस दलाची प्रतिमा उंचावाल, अशी अपेक्षा व्यक्त करून त्यांनी शुभेच्छा दिल्या.