१९ जूनला मोठी घोषणा? आदित्य ठाकरेंना नवी जबाबदारी मिळण्याचे संकेत

मुंबई (Shiv Sena Politics) : ठाकरे गटाचे आमदार आणि युवासेनाप्रमुख आदित्य ठाकरे यांच्यावर लवकरच शिव सेना कडून महत्त्वाची जबाबदारी सोपवली जाण्याची शक्यता वर्तवली जात आहे. सूत्रांच्या माहितीनुसार, त्यांना पक्षाच्या कार्याध्यक्षपदाची धुरा दिली जाऊ शकते. 19 जून रोजी होणाऱ्या वर्धापन दिनाच्या पार्श्वभूमीवर ही घोषणा होण्याची दाट शक्यता आहे. या निर्णयामुळे पक्षात त्यांचा प्रभाव आणि अधिकार मोठ्या प्रमाणात वाढतील, असे संकेत मिळत आहेत.

2003 मध्ये ज्या प्रकारे उद्धव ठाकरे यांना कार्याध्यक्षपदाची जबाबदारी देण्यात आली होती, त्याच धर्तीवर आता आदित्य ठाकरे यांच्याकडे पक्षाची सूत्रे सोपवण्याची तयारी सुरू असल्याचे ठाकरे गटातील नेत्यांचे मत आहे. यासाठी लवकरच कार्यकारिणीची बैठक घेऊन औपचारिक प्रस्ताव मांडला जाऊ शकतो आणि त्यास मंजुरी मिळण्याची शक्यता आहे.

मागील काही वर्षांत आदित्य ठाकरे यांनी संघटनात्मक कामकाजापासून निवडणूक नियोजनापर्यंत अनेक जबाबदाऱ्या समर्थपणे पार पाडल्या आहेत. त्यामुळे त्यांना अधिक मोठ्या भूमिकेत आणण्याची गरज असल्याची भावना पक्षातील काही नेत्यांकडून व्यक्त होत आहे. त्यांच्या नेतृत्वाखाली शिवसेनेत नव्या पिढीला संधी मिळेल आणि पक्षाला नवी ऊर्जा मिळू शकते, अशी अपेक्षा आहे.

जर आदित्य ठाकरे कार्याध्यक्ष झाले, तर त्यांच्या राजकीय प्रवासाला नवे वळण मिळेल आणि पक्षातील त्यांचे स्थान अधिक मजबूत होईल. हा निर्णय म्हणजे उद्धव ठाकरे यांच्याकडून पक्षाची जबाबदारी टप्प्याटप्प्याने आदित्य ठाकरे यांच्याकडे सोपवण्याच्या प्रक्रियेची सुरुवात मानली जात आहे.

Sanjay Raut news: संजय राऊत नेमकं काय म्हणाले?
या विषयावर प्रतिक्रिया देताना संजय राऊत यांनी सांगितले की, उद्धव ठाकरे यांनाही कालांतराने कार्याध्यक्षपदाची जबाबदारी देण्यात आली होती. आदित्य ठाकरे यांचे नाव पुढे येत असल्यास त्याचे स्वागतच केले पाहिजे. भविष्यातील राजकारणात तरुण नेतृत्वाला संधी देणे आवश्यक आहे. तसेच, मुंबई महापालिका निवडणुकांमध्ये आदित्य ठाकरे आणि त्यांच्या टीमने चांगली कामगिरी केल्याचेही त्यांनी नमूद केले.