गुढीपाडव्याच्या शुभमुहूर्तावर शिवस्मारकाचा अंतिम आराखडा तयार

सेनगाव (Sengaon Shiv Memorial) : सेनगाव येथील ऐतिहासिक आणि सांस्कृतिक वैभवात भर टाकणाऱ्या छत्रपती शिवाजी महाराज शिवस्मारकाच्या कामाला आता मोठी गती मिळाली आहे. गुरुवार, १९ मार्च रोजी गुढीपाडव्याच्या अत्यंत शुभमुहूर्तावर, प्रस्तावित अश्वारूढ पुतळ्याचे 'फायनल डिझाईन' (अंतिम आराखडा) प्रशासकीय स्तरावर प्राप्त झाले आहे. प्रसिद्ध इंजिनियर विजय कोटकर यांनी हे भव्य आणि देखणे डिझाईन तयार केले असून, आता प्रत्यक्ष कामाला सुरुवात होणार आहे.

सेनगाव शहराच्या मध्यवर्ती ठिकाणी हे शिवस्मारक (Sengaon Shiv Memorial) उभारले जाणार आहे. इंजिनियर विजय कोटकर यांनी तयार केलेल्या आराखड्यानुसार, हा अश्वारूढ पुतळा अत्यंत कलात्मक आणि शिवरायांच्या जाज्वल्य इतिहासाची साक्ष देणारा असेल. या स्मारकामुळे शहराच्या सौंदर्यीकरणात भर पडणार असून, येणाऱ्या पिढीसाठी हे प्रेरणास्थान ठरेल.

हे भव्य स्मारक (Sengaon Shiv Memorial) लोकसहभागातून आणि सर्वांच्या योगदानातून साकारले जाणार आहे. "आपल्या आराध्य दैवताचे स्मारक सर्वांच्या मदतीने उभे राहावे," या उद्देशाने शिवस्मारक समितीच्या वतीने सेनगाववासीयांना सढळ हस्ते मदत करण्याचे आवाहन करण्यात आले आहे. प्रत्येक नागरिकाने आपल्या परीने शक्य होईल ती देणगी देऊन या ऐतिहासिक कार्यात आपला खारीचा वाटा उचलावा, असे विनंतीवजा आवाहन करण्यात आले असुन शिवप्रेमी कडुन प्रतिसाद मिळत आहे.

डिझाईन फायनल झाल्यामुळे आता प्रत्यक्ष बांधकामाचा मार्ग मोकळा झाला आहे. आवश्यक तो निधी आणि तांत्रिक बाबींची पूर्तता करून तातडीने कामाला सुरुवात केली जाणार आहे. या (Sengaon Shiv Memorial) स्मारकामुळे शिवप्रेमींमध्ये उत्साहाचे वातावरण निर्माण झाले असून, गुढीपाडव्याच्या मुहूर्तावर मिळालेली ही बातमी सेनगावसाठी एक मोठी भेट मानली जात आहे.