स्वातंत्र्यवीर सावरकर जयंतीनिमित्त चिखलीत अभिवादन; सावरकर स्मारक उभारणीची भावना व्यक्त

चिखली (MLA Shweta Mahale Patil) : स्वातंत्र्यवीर विनायक दामोदर सावरकर यांच्या १४३ व्या जयंतीनिमित्त चिखली शहरातील स्वातंत्र्यवीर सावरकर चौक येथे समर्थ बहुउद्देशीय प्रतिष्ठानच्या वतीने अभिवादन कार्यक्रमाचे आयोजन करण्यात आले होते. यावेळी आमदार श्वेताताई महाले पाटील (MLA Shweta Mahale Patil) यांनी उपस्थित राहून स्वातंत्र्यवीर सावरकरांना विनम्र अभिवादन केले. कार्यक्रमाला पुणे येथील ज्येष्ठ समाजसेवक पद्मश्री गिरीश प्रभुणे यांची प्रमुख उपस्थिती लाभली होती, तर नगराध्यक्ष पंडितराव देशमुख विशेष अतिथी म्हणून उपस्थित होते.

यावेळी बोलताना आमदार श्वेताताई महाले पाटील (MLA Shweta Mahale Patil) यांनी स्वातंत्र्यवीर सावरकरांचे राष्ट्रनिष्ठ, त्यागमय आणि प्रेरणादायी जीवन प्रत्येक भारतीयासाठी ऊर्जा देणारे असल्याचे सांगितले. चिखली शहरात स्वातंत्र्यवीर सावरकर यांचे भव्य स्मारक व्हावे, अशी भावना सावरकर प्रेमींसह अनेक नागरिकांची असल्याचेही त्यांनी नमूद केले. प्रमुख वक्ते पद्मश्री गिरीश प्रभुणे यांनी सावरकरांच्या विचारांचा वारसा कृतीतून पुढे नेण्याचे आवाहन केले. नगराध्यक्ष पंडितराव देशमुख यांनीही मनोगत व्यक्त केले.

कार्यक्रमाचे प्रास्ताविक व सूत्रसंचालन समर्थ बहुउद्देशीय प्रतिष्ठानचे अध्यक्ष रेणुकादास मुळे यांनी केले, तर संचालक भिकू लोळगे यांनी आभार मानले. या प्रसंगी भाजप शहराध्यक्ष सागर पुरोहित, युवा मोर्चाचे जिल्हाध्यक्ष संतोष काळे, विजय खरे, श्याम वाकदकर, विविध संस्था व संघटनांचे पदाधिकारी, कार्यकर्ते तसेच सावरकर प्रेमी नागरिक मोठ्या संख्येने उपस्थित होते.