अपघातातील मृतकावर शोकाकुल वातावरणात अंत्यसंस्कार

चामोर्शी (Road Accident) : चामोर्शी तालुक्यातील तळोधी मोकासा मार्गावरील पोहार नदीजवळ रविवार दि. २९ मार्च  रोजी सायंकाळच्या सुमारास झालेल्या भीषण अपघातात दगावलेल्या ४ जणावर आज सोमवारी सबंधितांच्या गावी शोकाकुल वातावरणात अंत्यसंस्कार करण्यात आले. या घटनेमुळे भाडभिडी, कुनघाडा आणि गट्टेगुडा परिसरात शोककळा पसरली आहे.

प्राप्त माहितीनुसार, स्कार्पिओ आणि ‘प्रविण टूर्स अँड ट्रॅव्हल्स’ची प्रवासी गाडी यांच्यात पोहार नदीसमोरील पेट्रोल पंपाजवळ समोरासमोर जोरदार धडक झाली. यामध्ये स्कार्पिओमधील एकूण १५ प्रवाशांपैकी चार जणांचा जागीच मृत्यू झाला, तर अकरा जण गंभीर जखमी झाले.

या अपघातातील जखमींपैकी चालक गुरुदेव वासेकर आणि देवाजी गवारे यांची प्रकृती अत्यंत गंभीर असल्याने त्यांना पुढील उपचारासाठी नागपूर येथे हलविण्यात आले आहे. इतर जखमींमध्ये प्रतिमा रतन मोगरकर, गुरुदेव चिरकुट कुनघाडकर, निखिल जराते, कुणाल श्रावण कन्नाके, सुधाकर नकटू कुनघाडकर, अमर सखाराम चलाख, रेखा अमर चलाख, वेदांत संजय वैरागडे आणि करण कुमरे यांचा समावेश असून त्यांच्यावर गडचिरोली येथील  जिल्हा सामान्य रुग्णालयात उपचार सुरू आहेत.

चामोर्शी तालुक्यातील कुरुडजवळील रामपूर येथील अरुण कवळु किरमे यांची मुलगी ज्योती हिचा विवाह भाडभिडी मोकासा येथील चंद्रकांत धनराज कुनघाडकर यांच्याशी पार पडला होता. रामपूर येथे विवाह सोहळा आटोपून स्कार्पिओमधून वर्‍हाडी मंडळी परतत असताना हा भीषण अपघात घडला. धडकेची तीव्रता इतकी जबरदस्त होती की, अनेक प्रवाशांना छाती व डोक्याला गंभीर दुखापती झाल्या.अपघातानंतर सर्व जखमींना तात्काळ चामोर्शी येथील ग्रामीण रुग्णालयात प्राथमिक उपचारासाठी दाखल करण्यात आले. त्यानंतर पुढील उपचारासाठी त्यांना गडचिरोली येथील सामान्य रुग्णालयात हलविण्यात आले.

चामोर्शी पोलिसांची तत्परता

या संपूर्ण घटनेत चामोर्शी पोलिसांनी तत्परता दाखवत महत्त्वाची भूमिका बजावली. अपघाताची माहिती मिळताच पोलीस निरीक्षक दीपक डोंब यांच्या मार्गदर्शनाखाली पोलीस उपनिरीक्षक बन्सोड, तसेच पोलीस कर्मचारी विनायक मस्कार आणि राम राऊत व होमगार्ड यांनी तातडीने घटनास्थळी धाव घेतली. त्यांनी त्वरित अ‍ॅम्बुलन्सची व्यवस्था करून जखमींना रुग्णालयात पोहोचविले.सध्या या अपघाताचा पुढील तपास पोलीस निरीक्षक दीपक डोंब करीत असून चामोर्शी पोलीस ठाण्यात मर्ग दाखल करण्यात आला आहे. या दुर्दैवी घटनेमुळे संपूर्ण परिसरात हळहळ व्यक्त केली जात आहे.