परभणीत अवघ्या ४८ तासांत बेपत्ता महिलांचा शोध

परभणी/ पाथरी (PSI Santosh Maral) : परभणीच्या पाथरी पोलीस ठाण्यातील कर्तव्यदक्ष पोउनि .संतोष मरळ यांनी दाखविलेल्या तत्परता, धाडस आणि कर्तव्यदक्षतेबद्दल त्यांना प्रशस्तीपत्र देऊन गौरविण्यात आले आहे. नांदेड परिक्षेत्राचे पोलीस उप महानिरीक्षक कार्यालयाच्या वतीने हा सन्मान प्रदान करण्यात आला आहे.

पाथरी पोलीस ठाण्यात कार्यरत असताना ऑपरेशन शोध मोहिम - ०३ अंतर्गत त्यांनी  उल्लेखनीय कामगिरी बजावली आहे. परभणी जिल्ह्यातील गुन्हा नोंद क्रमांक ११०/२०२५ व ४९४ / २०२५ तसेच मिसिंग क्रमांक ०६ /२०२६ मधील पीडित महिलांचा अवघ्या ४८ तासांत शोध घेऊन त्यांना सुरक्षित ताब्यात घेण्यात त्यांनी यश मिळविले आहे. याचबरोबर संबंधित आरोपींनाही पोलिसांसमोर हजर करण्यात आले.

या मोहिमेदरम्यान पोउनि संतोष उत्तमराव मरळ (PSI Santosh Maral) यांनी सुमारे २ हजार किलोमीटरचा प्रवास करून अत्यंत कौशल्यपूर्ण तपास करत ही कारवाई यशस्वी केली. त्यांच्या कार्यात तांत्रिक कौशल्य, धाडस आणि कर्तव्यनिष्ठा दिसून आली. त्यांच्या या उल्लेखनीय कामगिरीची दखल घेत पोलीस अधीक्षक रविंद्रसिंह परदेशी तसेच पोलीस उप महानिरीक्षक शहाजी उमाप यांनी त्यांना प्रशस्तीपत्र देऊन सन्मानित केले आहे.या यशस्वी कामगिरीमुळे पोलीस दलाची प्रतिमा उंचावली असल्याचे म्हणत पोनि . लक्ष्मण केंद्रे यांनी यावेळी शुभेच्छा व्यक्त केल्या आहेत.