कळमेश्वर तालुक्यात औषध विक्रेत्यांचा कडकडीत बंद

काही रुग्णालयांतून गुपचूप औषध वितरण सुरू असल्याची चर्चा 

कळमेश्वर (Drug store closed) : अखिल भारतीय औषध विक्रेता संघटनेच्या देशव्यापी बंदच्या आवाहनाला प्रतिसाद देत कळमेश्वर शहरासह संपूर्ण तालुक्यात किरकोळ औषध विक्रेत्यांनी कडकडीत बंद पाळला. मात्र सुरुवातीला काही वेळ शहरातील हर्ड फार्मसी तसेच मेड प्लस फार्मसी सुरू असल्याचे दिसून आले  शहरातील बहुतांश मेडिकल दुकाने दिवसभर बंद असल्याने बंदला उत्स्फूर्त प्रतिसाद मिळाल्याचे चित्र दिसून आले.

ऑनलाइन औषध विक्री, कॉर्पोरेट कंपन्यांची वाढती स्पर्धा तसेच औषध व्यवसायासमोरील विविध समस्यांविरोधात हा बंद पुकारण्यात आला होता. बंदमुळे अनेक ठिकाणी औषध खरेदीसाठी आलेल्या नागरिकांना अडचणींचा सामना करावा लागला. मात्र अत्यावश्यक सेवा लक्षात घेता काही ठिकाणी आपत्कालीन स्वरूपात रुग्णांना सेवा देण्यात आल्याचेही सांगण्यात आले.

दरम्यान, काही खासगी रुग्णालयांच्या आतून रुग्णांना औषधे उपलब्ध करून दिली जात असल्याची खात्रीलायक माहिती काही रुग्णांनी नाव न छापण्याच्या अटीवर दिली. बाहेरील मेडिकल दुकाने बंद (Drug store closed) असताना काही हॉस्पिटलमधून औषध वितरण सुरू असल्याने तालुक्यात चर्चेला उधाण आले आहे. यामुळे बंदच्या नियमांचे समान पालन झाले का, असा सवालही उपस्थित केला जात आहे.

काही नागरिकांनी प्रशासनाने या प्रकाराची चौकशी करून स्पष्ट भूमिका घ्यावी, अशी मागणी केली आहे. दुसरीकडे औषध विक्रेता संघटनांनी बंद पूर्णतः यशस्वी झाल्याचा दावा करत सरकारने ऑनलाइन औषध विक्रीसंदर्भात कठोर निर्णय घ्यावा, अशी मागणी पुन्हा एकदा केली आहे.