पातूर नगरपरिषदेच्या सार्वत्रिक निवडणुकीचा बिगुल वाजला; २० जून रोजी मतदान, तर २१ जूनला मतमोजणी!

पातूर (Patur Municipal Election 2026) : राज्य निवडणूक आयोगाने अकोला जिल्ह्यातील पातूर नगरपरिषदेच्या संपूर्ण सार्वत्रिक निवडणुकीचा अधिकृत कार्यक्रम आज जाहीर केला आहे. पातूर नगरपरिषदेची प्रभाग रचना विहित वेळेत पूर्ण न झाल्याने यापूर्वी निवडणुका लांबणीवर पडल्या होत्या, मात्र आता आयोगाने नवीन वेळापत्रक प्रसिद्ध केले आहे.

निवडणुकीचे स्वरूप : 

पातूर नगरपरिषदेमध्ये एकूण १ नगराध्यक्ष पद आणि २० सदस्य पदांसाठी ही निवडणूक पार पडणार आहे. विशेष म्हणजे, महाराष्ट्र नगरपरिषदा अधिनियमातील नवीन तरतुदीनुसार नगराध्यक्षांची निवड थेट जनतेतून केली जाणार असून त्यांचा कार्यकाळ पाच वर्षांचा असेल.

निवडणूक वेळापत्रक खालीलप्रमाणे:

• जिल्हाधिकाऱ्यांनी निवडणूक नोटीस प्रसिद्ध करणे: १२ मे २०२६
• नामनिर्देशनपत्रे भरण्याचा कालावधी: १८ मे ते २५ मे २०२६ (सकाळी ११ ते दुपारी ३ पर्यंत)
• नामनिर्देशनपत्रांची छाननी: २६ मे २०२६
• अर्ज मागे घेण्याची मुदत (अपील नसल्यास): २ जून २०२६ पर्यंत
• मतदानाचा दिनांक: २० जून २०२६ (सकाळी ७:३० ते संध्याकाळी ५:३०)
• मतमोजणी व निकाल: २१ जून २०२६
• राजपत्रात निकाल प्रसिद्ध करणे: २३ जून २०२६

आचारसंहिता लागू:

निवडणूक कार्यक्रम जाहीर झाल्यापासून पातूर नगरपरिषद संपूर्ण क्षेत्रात आचारसंहिता लागू झाली आहे. मंत्री, खासदार किंवा आमदारांना मतदारांवर प्रभाव पाडणारी कोणतीही घोषणा किंवा प्रलोभन देता येणार नाही, असे आयोगाने स्पष्ट केले आहे.

महत्त्वाची टीप:

राखीव जागेवरून निवडणूक लढविणाऱ्या उमेदवारांना नामनिर्देशन पत्रासोबत जात वैधता प्रमाणपत्र सादर करणे आवश्यक आहे. प्रमाणपत्र नसल्यास पडताळणी समितीकडे अर्ज केल्याचा पुरावा देणे बंधनकारक असून, निवडून आल्यापासून ६ महिन्यांच्या आत वैधता प्रमाणपत्र सादर करण्याचे हमीपत्र द्यावे लागेल.

पातूरसह अकोला जिल्ह्यातील अकोट नगरपरिषदेच्या एका रिक्त जागेसाठी देखील याच वेळापत्रकानुसार निवडणूक पार पडणार आहे.