पातूर येथे मतदान जनजागृती रॅलीचे आयोजन

पातूर (Patur Election Rally) : पातूर नगर परिषद सार्वत्रिक निवडणुकीच्या पार्श्वभूमीवर शहरात मतदारांमध्ये जागृती निर्माण करण्यासाठी एक विशेष मोहीम राबवण्यात आली. निवडणूक निर्णय अधिकाऱ्यांच्या निर्देशानुसार, १७ जून २०२६ रोजी सकाळी पातूर नगर परिषद कार्यालयातील अधिकारी आणि कर्मचाऱ्यांच्या वतीने एका भव्य *'मतदान जनजागृती रॅली'*चे आयोजन करण्यात आले होते.

ही जनजागृती रॅली (Patur Election Rally) पातूर नगर परिषद कार्यालयापासून सुरू होऊन संपूर्ण पातूर शहरात फिरली. मुख्य मार्गांवरून गस्त घालत मतदारांना मतदानाचा हक्क बजावण्याचे आवाहन केल्यानंतर रॅलीची सांगता पुन्हा नगर परिषद कार्यालयात झाली. पातूर नगर परिषदेच्या आगामी सार्वत्रिक निवडणुकीसाठी २० जून २०२६ रोजी मतदान होणार आहे. या पार्श्वभूमीवर जास्तीत जास्त नागरिकांनी मतदानात भाग घ्यावा, या उद्देशाने या रॅलीचे आयोजन करण्यात आले होते. या प्रसंगी पातूर नगर परिषदेचे मुख्य अधिकारी *अक्षय गडलिंग* यांच्यासह नगर परिषदेच्या सर्व विभागांचे अधिकारी आणि कर्मचारी मोठ्या संख्येने उपस्थित होते.