परभणीच्या सेलूमध्ये घरावर हल्ला; डीजे जनरेटरसह मालमत्तेला आग

८ जणांसह इतरांवर गुन्हा दाखल; १७ ते १८ एप्रिल रोजी मध्यरात्रीची घटना

परभणी (Selu House Attack) : सेलू शहरातील गायत्री नगर परिसरात १७ ते १८ एप्रिल रोजी मध्यरात्रीच्या सुमारास काही जणांनी एकत्र येत घरावर हल्ला करून तोडफोड, जाळपोळ व चोरी केल्याची घटना घडली आहे. या प्रकरणी सेलू पोलीस ठाण्यात मंगळवार ५ मे रोजी ८ जणांसह इतरांवर विरुध्द गुन्हा दाखल करण्यात आल्याची माहिती पोलीस सुत्रांनी दिली आहे.

पोलीसांनी दिलेल्या माहितीनुसार, सिलवान मिलिंद साळवे (वय ३२, रा. गायत्री नगर, सेलू) यांनी दिलेल्या फिर्यादीवरून गुन्हा दाखल करण्यात आला आहे. फिर्यादीचे मेव्हणे बुद्धभूषण ढगे यांच्या घराजवळ आरोपींनी जमाव करून कट रचला.  ढगे हे (Selu House Attack) खून प्रकरणातील आरोपी असल्याने त्यांच्या नातेवाईकांना धमकावण्याच्या उद्देशाने आरोपींनी फिर्यादी व त्यांच्या कुटुंबीयांना ‘घरासकट जाळून टाकू’ अशा धमक्या दिल्या. यानंतर आरोपींनी फिर्यादीच्या घरासमोर उभी असलेली पिकअप गाडी व त्यातील डीजे जनरेटरला आग लावून सुमारे १२ लाख रुपयांचे नुकसान केले. तसेच ढगे यांच्या घरासमोर उभी असलेली मोटारसायकल जाळून सुमारे ५० हजार रुपयांचे नुकसान केले.

घरात अनधिकृत प्रवेश करून घरातील साहित्याची तोडफोड करत सुमारे २ लाखांचे नुकसान केले. याशिवाय कपाट फोडून त्यातील दागिने व रोख रक्कम चोरी केल्याचेही फिर्यादीत नमूद आहे. या (Selu House Attack) प्रकरणी अ‍ॅड. विष्णु ढोले, योगेश चंडेलिया, विशाल वाकळे, अर्जुन बावीसे, टिल्या उर्फ पिल्या पालवे, सम्राट धापसे, अक्षय साळवे यांच्यासह इतर ३ ते ४ जणांवर विविध कलमांन्वये गुन्हा नोंदवण्यात आला आहे. या प्रकरणाचा पुढील तपास पोलीस उपनिरीक्षक शाकेर शेख यांच्या मार्गदर्शनाखाली सुरू आहे. दरम्यान सदरिल प्रकरणी उशिराने गून्हा दाखल करण्यात आल्याने  या प्रकरणात राजकीय व्यक्तीचा हस्तक्षेप आणि व्यक्तीगत वादातून अ‍ॅड. विष्णू ढोले यांना गोवण्याचे षडयंत्र असल्याची चर्चा शहरातील  नागरीक करत आहेत.