परभणीत सिग्नल वायर तोडून रेल्वे रोखली; चोरट्यांचा मध्यरात्री धुमाकूळ

मानवत (Parbhani Railway Crime) : रेल्वे सिग्नलचे वायर तोडून छत्रपती संभाजी नगरहून गुरुवार १६ एप्रिलच्या पहाटे अडीच वाजेच्या सुमारास मानवत रोड रेल्वे स्थानक परिसरात चोरट्यांनी काकीनाडा साई एक्सप्रेस रोखली. चाकू, तलवार आदी शस्त्राचा धाक दाखवत जवळपास सव्वा तीन लाखाची लुटमार केली. अंधाराचा फायदा घेत चोरटे पसार झाले.

याबाबत मिळालेली प्राथमिक माहिती अशी की, गुरुवार १६ एप्रिलच्या पहाटे २.५० वाजेच्या सुमारास गाडी क्र. १७२०६ काकीनाडा साईनगर रेल्वे एक्सप्रेम मानवत रोड रेल्वेस्थानकात येत होती. काकीनाडा एक्सप्रेस  गाडीला मानवतरोड स्टेशन येथे थांबा नाही, मात्र सिग्नल मिळत नसल्याने ब्रीजजवळ रेल्वे थांबली. गाडी थांबतात चोरट्यांनी जनरल व एस ४ या डब्यामध्ये प्रवेश केला. चाकू, तलवारीचा धाक दाखवून महिला प्रवाशांचे दागिने लुटले. (Parbhani Railway Crime) रेल्वे सुरक्षा बलाचे जवान घटनास्थळी पोहोचण्यापूर्वी चोरटे पसार झाले. जवळपास सहा दरोडखोर होते. आरपीएफच्या जवानांनी चोरट्यांचा पाठलाग केला. मात्र ते पसार होण्यात यशस्वी झाले. घटनेची माहिती मिळताच रेल्वे अधिकारी, कर्मचारी, एपीआय मिना, पोकॉ. पदमाकर मोगरे, डॉगक्वॉड, क्राईम शाखेचे अधिकारी यांनी घटनास्थळी धाव घेतली. सिग्नल यंत्रणेचे केबल वायर दुरुस्त केली. या संपूर्ण घटनाक्रमा मुळे एक्सप्रेस तब्बल ४० मिनिटे मानवतरोड स्टेशनवर थांबली. रेल्वे सुरक्षा बलाचे पोउपनि. दिलीप कांबळे व जीआरपी सपोनि. शैलेश जोगदंड यांनी घटनास्थळी धाव घेत पंचनामा केला. गुन्हा दाखल करण्याची प्रक्रिया चालू असल्याचे सांगण्यात आले.

मानवत रोड येथे रेल्वे प्रवाशांची सुरक्षा धोक्यात 

मानवतरोड रेल्वे स्टेशन येथे अशा प्रकारच्या घटना यापूर्वी अनेकदा घडलेल्या आहेत. रेल्वे प्रवासी संघटनेच्या वतीने येथे कायमस्वरूपी रेल्वे पोलीस बल चौकी सुरू करण्याची मागणी अनेकदा करण्यात आली परंतु रेल्वे विभागाच्या अधिकार्‍यांनी या मागणीकडे सातत्याने दुर्लक्ष केले.