पान मसाला जाहिरातींवर सनी देओलचा स्पष्ट नकार; म्हणाला, ‘ज्या गोष्टींवर विश्वास नाही, त्यांचा प्रचार करणार नाही’

शाहरुख खान, अजय देवगण आणि टायगर श्रॉफ यांना FDAची कारणे दाखवा नोटीस; त्याच पार्श्वभूमीवर सनी देओलचे वक्तव्य चर्चेत

मुंबई : पान मसाल्याच्या जाहिरातींवरून बॉलिवूडमध्ये सुरू असलेल्या चर्चेला आता अभिनेता सनी देओलच्या वक्तव्यामुळे नवा आयाम मिळाला आहे. महाराष्ट्र अन्न आणि औषध प्रशासनाने पान मसाल्याच्या जाहिराती केल्याप्रकरणी अभिनेता शाहरुख खान, अजय देवगण आणि टायगर श्रॉफ यांना कारणे दाखवा नोटीस बजावली आहे. या पार्श्वभूमीवर सनी देओलने मात्र अशा उत्पादनांच्या जाहिराती करण्यास स्पष्ट नकार दिल्याचे समोर आले आहे.

सनी देओल सध्या ‘बंटवारा 1947’ या चित्रपटामुळे चर्चेत आहे. याच चित्रपटाच्या निमित्ताने त्याने शुभंकर मिश्राच्या पॉडकास्टला मुलाखत दिली. या संवादात त्याला पान मसाल्याच्या जाहिरातींमध्ये काम न करण्यामागचे कारण विचारण्यात आले.

यावर सनी देओलने सांगितले की, पान मसाल्याच्या जाहिराती करण्याची आपली इच्छा नाही आणि भविष्यातही आपण अशा जाहिराती करणार नाही. आपल्याला अशा प्रकारच्या जाहिरातींच्या ऑफर्स मिळतात, मात्र ज्या उत्पादनांवर स्वतःचा विश्वास नाही किंवा ज्यांचे आपण समर्थन करत नाही, त्यांचा प्रचार करणे योग्य वाटत नसल्याचे त्याने स्पष्ट केले.

आपली जाहिरात निवड ही केवळ व्यावसायिक बाब नसून सदसद्विवेकबुद्धीशी संबंधित असल्याचेही सनी देओलने नमूद केले. स्वतःला योग्य वाटणाऱ्या गोष्टींचेच समर्थन करणे पसंत असल्याचे त्याने सांगितले. काही गोष्टी आपण करत नाही, कारण त्यासाठी आपली अंतःप्रेरणा परवानगी देत नसल्याचेही त्याने स्पष्ट केले.

दरम्यान, मुलाखतीत सनी देओलच्या जाहिरातींमधील कामाबाबतच्या भूमिकेवरही चर्चा झाली. यावेळी अमिताभ बच्चन, शाहरुख खान, हृतिक रोशन आणि अजय देवगण यांसारख्या जाहिरातींमध्ये दिसणाऱ्या लोकप्रिय कलाकारांचा संदर्भ देण्यात आला.

यावर सनी देओलने आपण भारताचे प्रतिनिधित्व करतो आणि त्यासोबत येणाऱ्या जबाबदाऱ्यांचाही विचार करतो, असे म्हटले. आपल्याकडे जाहिरातींच्या ऑफर्स का येत नाहीत, याबाबत आपण अनभिज्ञ असल्याचेही त्याने सांगितले.

सनी देओलच्या म्हणण्यानुसार, करिअरच्या सुरुवातीच्या काळातही त्याला चित्रपटांच्या ऑफर्स कमी मिळत होत्या. जाहिरातींच्या बाबतीतही नेमके काय कारण आहे, याची आपल्याला कल्पना नसल्याचे त्याने नमूद केले.

पान मसाला जाहिरातींवरून शाहरुख खान, अजय देवगण आणि टायगर श्रॉफ यांना FDAची कारणे दाखवा नोटीस बजावण्यात आल्यानंतर सनी देओलची ही भूमिका सध्या चर्चेचा विषय ठरत आहे.