पेपर फुटीच्या लाभार्थ्यांमागे चौकशीचे शुक्लकाष्ठ; नाव कोणाचेच समोर येईना!

वसमत (NEET Paper leak) : नीट पेपर फुटी प्रकरणी नांदेड येथेतळ ठोकून असलेल्या पथकाने वसमत येथील दोन पालकांची चौकशी केल्याचे वृत्त आहे. पेपर फुटीच्या लाभधारकांच्या यादीत शहरातील मोठ्या नावांची चर्चा असल्याने  मोठी खळबळ उडाली आहे. 

 नांदेड येथील आर सी सी कोचिंग क्लासेसचे  संचालक मोटेगावकर नीट पेपर फुट प्रकरणात (NEET Paper leak) अडकले. त्यामुळे त्यांच्या क्लास मधील विद्यार्थी व पालकांकडे संशयाने पाहिले जात आहे वसमत तालुक्यासहीत जिल्हाभरातील  विद्यार्थी मोठ्या संख्येने त्यांच्या क्लासेस मध्ये होते. यात काही पालकांचा पेपर फूट प्रकरणात प्रत्यक्ष-अप्रत्यक्ष सहभाग आहे का याचा तपास सुरू आहे या शोध मोहिमे दरम्यान वसमत येथील काही पालकांपर्यंत शोध मोहीम पोहोचली असल्याचे समोर येत आहे. गेल्या दोन दिवसापासून वसमत मध्ये पथक येऊन गेले, काही जणांना पुण्याला, काही जणांना नांदेडला बोलावून घेऊन चौकशी झाली, अशा प्रकारच्या चर्चा सुरू आहेत. नेमकी कोणाची चौकशी झाली हे मात्र गुलदस्त्यातच आहे.

नांदेड येथील तपास पथकाचे अधिकारी वसमतला येऊन गेल्याची चर्चा शहरभर असली तरी नेमकी चौकशी झाली कोणाची याबाबत मात्र कोणीही काही सांगत नाही. या प्रकरणातील एकसह आरोपी डॉक्टर असल्यामुळे स्थानिक डॉक्टरांकडे शंकेच्या नजरेने पाहिले जात आहे. या बाबत डॉक्टर असोसिएशनच्या पदाधिकार्‍यांनी मात्र या सर्व अफवा असल्याचे सांगितले.