हुजूर साहेब रेल्वेस्टेशनवर रेल्वेच्या रिकाम्या डब्याला भीषण आग; संपूर्ण सीट जळून खाक

नांदेड (Nanded Railway fire) : येथील हुजूर साहेब रेल्वेस्टेशनच्या मेंटेनन्स सेक्शनमध्ये दुरुस्तीसाठी उभ्या असलेल्या एका रेल्वे डब्याला अचानक भीषण आग लागल्याची घटना २१ मे रोजी सकाळी घडली. सुदैवाने हा डबा रिकामा असल्याने आणि मुख्य प्लॅटफॉर्म लाईनपासून दूर असल्याने मोठी जीवितहानी टळली. मात्र, या आगीत डब्यातील सर्व सीट जळून खाक झाले आहेत.

मिळालेल्या माहितीनुसार, नांदेड विभागातील हुजूर साहेब रेल्वेस्टेशनवर सकाळी ६ वाजताच्या सुमारास प्लॅटफॉर्म लाईनपासून दूर उभ्या असलेल्या एका रिकाम्या डब्यातून अचानक धूर आणि आगीच्या ज्वाला निघत असल्याचे निदर्शनास आले. रेल्वे कर्मचाऱ्यांनी तात्काळ सतर्कता दाखवत घटनास्थळी धाव घेतली. तेथे उपलब्ध असलेल्या पाण्याच्या आणि अग्निशामक साधनांच्या मदतीने कर्मचाऱ्यांनी आग विझवण्याचे शर्थीचे प्रयत्न केले. रेल्वे प्रशासनाच्या या तातडीच्या कार्यवाहीमुळे तब्बल ४५ मिनिटांनी, म्हणजेच सकाळी ६:४५ वाजेच्या सुमारास आग पूर्णपणे आटोक्यात आणण्यात रेल्वे प्रशासनाला यश आले.मात्र एका बोगीतील सीट,वायरींग आणि बोगी जळून मोठे नुकसान झाले आहे.

तापमानातील वाढीमुळे आगीच्या घटनांमध्ये वाढ?

या (Nanded Railway fire) दुर्घटनेत कोणतीही जीवितहानी किंवा कोणीही जखमी झालेले नाही, अशी माहिती रेल्वे प्रशासनाने दिली आहे. सध्या नांदेड जिल्ह्यात उन्हाचा कडाका प्रचंड वाढला असून तापमान ४२ अंश सेल्सिअसवर पोहोचले आहे. या वाढत्या उष्णतेमुळेच जिल्ह्यात आगीच्या घटनांमध्ये वाढ होत असल्याचे बोलले जात आहे.

"रेल्वे डब्याला लागलेल्या आगीचे नेमके कारण अद्याप स्पष्ट झालेले नाही. या आगीचे मुख्य कारण शोधण्याचे काम सध्या रेल्वे प्रशासनाकडून सुरू आहे."
- रेल्वे प्रशासन, नांदेड विभाग